ભરૂચ : જંબુસરના મંગણાદ નજીક માર્ગ અકસ્માતમાં મોપેડ ચાલકનું કરુણ મોત…

ભરૂચ જિલ્લાના જંબુસર તાલુકાના મંગણાદ ગામ નજીક અજાણ્યા વાહન ચાલકે મોપેડ ચાલકને ટક્કર મારી હતી. સર્જાયેલા અકસ્માતમાં ગંભીર ઈજાના પગલે મોપેડ સવાર યુવકનું કરુણ મોત નીપજ્યું હતું.

મળતી માહિતી અનુસાર, ભરૂચ  જિલ્લાના વાગરા તાલુકાના વસ્તી ખંડાલી ગામ ખાતે રહેતા સદ્દામ અલ્લારખા ભઠ્ઠી મોપેડ લઈને મંગણાદ ગામ નજીકથી પસાર થઇ રહ્યા હતા. તે દરમિયાન અજાણ્યા વાહન ચાલકે તેઓના મોપેડને ટક્કર મારીને અકસ્માત સર્જી ફરાર થઇ ગયો હતો. સર્જાયેલા અકસ્માતમાં સદ્દામ અલ્લારખા ભઠ્ઠીને ગંભીર ઈજાઓ પહોંચતા કરુણ મોત નીપજ્યું હતું.

બનાવ અંગે જંબુસર પોલીસે મૃતકના મૃતદેહને જંબુસર સબ ડીસ્ટ્રીક્ટ હોસ્પિટલ ખાતે પોસ્ટમોર્ટમ અર્થે ખસેડી અકસ્માત સર્જીને ફરાર થયેલા અજાણ્યા વાહન ચાલક વિરુદ્ધ ફરિયાદ નોંધી તપાસ શરૂ કરી હતી. અત્રે ઉલ્લેખનીય છે કે, કોઈ ઇકો કારનો અજાણ્યો ચાલક મોપેડ સવાર યુવકને ટક્કર મારીને ફરાર થઇ ગયો હોવાનું લોકમુખે ચર્ચાઇ રહ્યું છે.