• જંબુસર નગરમાંથી વધુ એક અકસ્માતની ઘટના સામે આવી

• જંબુસરની સેન્ટર પ્લાઝા ચોકડી નજીક સર્જાયો હતો અકસ્માત

• ડમ્પર ચાલકે અડફેટમાં લેતા બાઇક સવારનું ઘટનાસ્થળે મોત

• અકસ્માતના પગલે લોકોએ જંબુસર પોલીસ મથકમાં જાણ કરી

• પોલીસે અકસ્માતે મોત નોંધી આગળની કાર્યવાહી હાથ ધરી

ભરૂચ જિલ્લાના જંબુસર નગરમાં ડમ્પર ચાલકે ટક્કર મારતા બાઈક ચાલકનું ઘટના સ્થળે કરૂણ મોત નીપજ્યું હતું. ભરૂચ જિલ્લામાં દિન પ્રતિદિન અકસ્માતોની વણઝાર વચ્ચે કેટલાક લોકોને જીવ ગુમાવવાનો વારો આવતો હોય છે, ત્યારે ભરૂચ જિલ્લાના જંબુસર નગરમાંથી વધુ એક અકસ્માતની ઘટના સામે આવી છે.

મળતી માહિતી અનુસાર, જંબુસર નગરની સેન્ટર પ્લાઝા ચોકડી નજીક ડમ્પર નં.GJ-16-AV-7333ના ચાલકે ગફલતભરી રીતે વાહન હંકારી લાવી બાઇક નં.GJ 16CL 0802 પર સવાર ચાલકને અડફેટમાં લીધો હતો. આ અકસ્માત એટલો ભયંકર હતો કે, ડમ્પરની ટક્કરે બાઇક સવાર વ્યક્તિનું ઘટના સ્થળે જ કરૂણ મોત નીપજ્યું હતું.

બનાવના પગલે આસપાસના લોકો ટોળે વળ્યા હતા, જ્યારે ઘટનાની જાણ થતા જંબુસર પોલીસ કાફલો પણ દોડી આવ્યો હતો. ત્યારબાદ પોલીસે મૃતદેહને પોસ્ટમોર્ટમ અર્થે ખસેડ્યો હતો. પોલીસ તપાસમાં મૃતક વ્યક્તિ રાજેન્દ્રસિંહ સિંધા હોવાનું જાણવા મળ્યું છે, ત્યારે પોલીસે અકસ્માતે એક વ્યક્તિનું મોત નોંધી આગળની કાર્યવાહી હાથ ધરી છે.