ભરૂચ: દુધધારા ડેરીની ચૂંટણીમાં ભાજપના મેન્ડેટનું પણ માન ન જળવાયુ, અરુણસિંહ અને ઘનશ્યામ પટેલની પેનલ વચ્ચે ખેલાશે ચૂંટણી જંગ !

ભરૂચની દુધધારા ડેરીની ચૂંટણીમાં ભાજપે ભાજપ સામે જ ખેલ ખેલ્યો હોવાનો ઘાટ ઘડાયો છે .મેન્ડેટ માટે મોવડીઓની મધ્યસ્થી છતાં હવે ચૂંટણી નક્કી છે જેમાં ધારાસભ્ય અરૂણસિંહ રણા અને ઘનશ્યામ પટેલની પેનલ વચ્ચે ચૂંટણી જંગ ખેલાશે

ભરૂચની દુધધારા ડેરીની ચૂંટણીને લઈને ભાજપમાં આંતરિક ઘમાસાણ ચરમસીમાએ છે. પ્રદેશ ભાજપ દ્વારા આપવામાં આવેલા મેન્ડેટને સર્વોપરી માનવાનો પ્રયાસ કરાયો પરંતુ ક્ષેત્રીય નેતાઓએ આ પ્રયત્નો પર પાણી ફેરવી દીધું છે. મેન્ડેટ વિરુદ્ધ ભાજપના આગેવાનો સામસામે મેદાનમાં જોવા મળશે.ધારાસભ્ય અરૂણસિંહ રણાની પેનલમાંથી સી.આર. પાટીલના મેન્ડેટ વિરુદ્ધ એક નહીં પણ 12 ઉમેદવારો ચૂંટણીમાં ઉતાર્યા છે. 

અરુણસિંહ રણાના સમર્થનમાં ઊભેલા 3 ઉમેદવારોમાંથી એક ઉમેદવાર પ્રકાશ દેસાઈને માજી ચેરમેન  ઘનશ્યામ પટેલે બિનહરીફ બનાવી દીધા છે પણ ધારાસભ્ય અરૂણસિંહ રણાએ નમતું ઝોખ્યું નહિ. અરુણસિંહ રણા અને પ્રકાશ દેસાઈ તેમની પેનલને ચૂંટણી લડાવવા મક્કમ છે. જો કે અમુલ ડેરીની ચૂંટણી જેવી પરિસ્થિતિ પુનરાવૃત્તિ થાય અને પક્ષ વિરુદ્ધ કાર્ય કરવા બદલ શિસ્તભંગની કાર્યવાહી થાય તો અરૂણસિંહ રણા અને પ્રકાશ દેસાઈની મુશ્કેલી વધી શકે છે.

ચૂંટણી પ્રક્રિયાની અંતિમ વિગતો મુજબ, કુલ 21 ઉમેદવારી પત્ર પરત ખેંચાયા છે અને 1 બેઠક બિનહરીફ ગઈ છે. હવે 14 બેઠકો માટે 19 સપ્ટેમ્બરએ મતદાન યોજાવાનું છે.ભાજપની જ અંદરખાનાની લડાઈની અપક્ષ ઉમેદવાર એવા મહેશ વસાવા મજા લઈ રહ્યા છે તેઓએ પોતાની જીતના દાવા સાથે ભાજપ પર પ્રહાર કરી રહ્યા છે.

કરોડો રૂપિયાનો વહીવટ ધરાવતી દૂધધારા ડેરીની ચૂંટણીમાં ભાજપના જ બે બળિયાઓ સામસામે છે ત્યારે આ બધાની વચ્ચે એક ગણગણાટ એ પણ છે કે મેન્ડેટ ન મેળવનાર સામે ભાજપ શીસ્તનો કોરડો વીંઝે  તો બળવો કરી નવો રાજકીય પક્ષ ઊભો કરવની ચીમકી પણ અપાઈ શકે છે.