• ગુજરાતમાંDGVCL દ્વારા સ્માર્ટ મીટર લગાડવાની કામગીરી

• સ્માર્ટ મીટર સામે વિરોધના વંટોળ વચ્ચે વધુ એક ઘટના

• રૂ. 80 લાખ વીજબિલ આવતા જ વીજ ગ્રાહકના હોશ ઉડ્યા

• વીજ ગ્રાહકે તાત્કાલિક ધોરણેDGVCL કચેરીએ રજૂઆત કરી

• ટેક્નિકલ ભૂલ ગણાવીDGVCLએ વીજ ગ્રાહકને નવું બિલ આપ્યું

ગુજરાત રાજ્યમાંDGVCL દ્વારા સ્માર્ટ મીટર લગાડવાની ચાલતી કામગીરી સામે વિરોધના વંટોળ ઊભો થયો છે, તેવામાં ભરૂચના કુકરવાડામાં રહેતા સામાન્ય પરિવારને વીજ કંપનીએ રૂ. 80 લાખનું વીજ બિલ પકડાવ્યું હોવાનો ચોંકાવાનારો કિસ્સો પ્રકાશમાં આવ્યો છે.

ભરૂચ શહેર તથા જિલ્લામાંDGVCL દ્વારા સ્માર્ટ મીટર લગાડવાની કામગીરી વચ્ચે હવે ભારે વિવાદ ઉભો થયો છે. શહેરની અનેક સોસાયટીઓના રહીશો દ્વારા સ્માર્ટ મીટરનો વિરોધ કરવામાં આવી રહ્યો છે. રહીશોનો આક્ષેપ છે કે, DGVCLના કર્મચારીઓ સ્માર્ટ મીટર જબરદસ્તી લગાવી રહ્યા છે, અને લોકોની ફરિયાદો સાંભળવા માટે કોઇ તૈયાર નથી.

ભરૂચની એક સોસાયટીમા સ્માર્ટ મીટર લગાડવા પહોંચેલા વીજ કર્મચારીઓને રહીશોએ સોસાયટીમાંથી બહાર કરી દીધા હતા. સ્માર્ટ મીટર મામલે હાલ જબરજસ્ત આંદોલનનું વાતાવરણ ઊભું થયું છે, ત્યારે આ વિવાદ વચ્ચે ભરૂચના કુકરવાડા ગામની નવી નગરીમાંથી ચોંકાવનારી ઘટના સામે આવી છે. નવ નગરીમાં રહેતા બુધાભાઈ વસાવા કે, જે એક ખાનગી કંપનીમાં સફાઈ કર્મચારી તરીકે નોકરી કરે છે, અને મહિને 12 હજાર રૂપિયા કમાય છે. તેમને વીજ કંપનીએ 80 લાખ રૂપિયાનું વીજ બિલ પકડવાતા પરિવારના હોશ ઉડી ગયા હતા.

આ મામલે વીજ ગ્રાહકે તાત્કાલિકDGVCLના અધિકારીઓનો સંપર્ક સાધ્યો હતો. જોકે, તપાસ બાદ અધિકારીઓએ પોતાની ટેક્નિકલ ભૂલ ગણાવી તાત્કાલિક બિલને સુધારી વીજ ગ્રાહકને 1,400 રૂપિયાનું નવું બિલ આપ્યું હતું. બુધાભાઈએ જણાવ્યું કે, “બિલ તો સુધારી દીધું, પણ મારી જેમ કોઈ સામાન્ય માણસને આવું બિલ મળે તો તેને તાત્કાલિક હ્રદયઘાત આવી જાય એવી સ્થિતિ સર્જાઈ શકે. આવી ભૂલ જ કેમ થાય છે..?, અત્રે ઉલ્લેખનીય છે કે, ભરૂચમાં વીજ કંપની દ્વારા ચાલતી સ્માર્ટ મીટર લગાડવાની કામગીરી વચ્ચે આ પ્રકારનો કિસ્સો આગમાં ઘી ઉમેરવા જેવો સાબિત થયો છે.