ભરૂચ: અંકલેશ્વરમાં દોઢ લાખથી વધુ ભક્તોની ઉપસ્થિતિમાં હરિપ્રબોધમ્ યુવા મહોત્સવની શિસ્તબદ્ધ ભવ્ય ઉજવણી

• હરિપ્રબોધમ મહોત્સવની કરાઈ ઉજવણી

• દેશ વિદેશમાંથી હરિ ભક્તો રહ્યા ઉપસ્થિત

• દોઢ લાખથી વધુ ભક્તોએ લીધો ઉત્સવનો લ્હાવો

• પ્રબોધસ્વામીજીના આર્શીવચનથી તરબોળ બન્યા ભક્તો

• મહોત્સવ નિમિતે 5000 યુનિટ બ્લડ પણ એકત્ર કરાયું  

ભરૂચ જિલ્લાના અંકલેશ્વર નેશનલ હાઇવે એરપોર્ટ સામેની વિશાળ જગ્યામાં હરિપ્રબોધમ્ યુવા મહોત્સવનું ભવ્ય આયોજન કરવામાં આવ્યું હતું,આ પ્રસંગે વિશાળ યુવા સમુદાય અને આમંત્રિત મહેમાનોએ લાભ લીધો હતો.

હરિપ્રસાદસ્વામીજીના 91માં પ્રાગટ્ય દિન તથા પ્રબોધસ્વામીજીના 72માં પ્રાગટ્ય દિન નિમિત્તે ભરૂચના અંકલેશ્વર નજીક નેશનલ હાઈવે પર એરપોર્ટ પાસે આવેલ ગ્રાઉન્ડમાં 5મી જાન્યુઆરી, રવિવારે 350 વીઘા જગ્યામાં મહોત્સવ યોજાયો હતો.જેમાં અમેરિકા, યુકે, કેનેડા, જર્મની, ન્યુઝીલેન્ડ, ઓસ્ટ્રેલિયા સહિત 12 જેટલા દેશો તથા ગુજરાત, મહારાષ્ટ્ર, પંજાબ, ઉત્તર પ્રદેશ, કર્ણાટક માંથી અંદાજે દોઢ લાખથી વધુ હરિભક્તોનો માનવ મહેરામણ ખૂબ જ શિસ્ત અને ભક્તિથી આ મહોત્સવમાં ઉમટયો હતો.

સંતવર્ય શ્રી સર્વમંગલસ્વામીએ પ્રબોધસ્વામીજીની સાધુતાના પ્રસંગોનું દર્શન કરાવતા જણાવ્યું હતું કે, પ્રબોધસ્વામીની આધ્યાત્મિક ગરીબાઈની આ અસર છે કે દોઢ લાખ યુવકો શિસ્તથી બેસી રહ્યા છે. પ્રબોધસ્વામીજીના જીવન પ્રસંગોનો ગ્રંથ “સમર્થની સાધુતા”નું અનાવરણ કરવામાં આવ્યું હતું.

મહોત્સવમાં ઉપસ્થિત સંતગણમાં ગુમાનદેવ હનુમાનજી મંદિરના પૂ. મનમોહનદાસજી ઉપસ્થિત રહ્યા હતા. વિધ વિધક્ષેત્રના અગ્રણીઓએ બહોળી સંખ્યામાં ઉપસ્થિત રહી મહોત્સવના આયોજનને બિરદાવ્યું હતું. જેમાં ધારાસભ્ય ઈશ્વરસિંહ પટેલ, ધારાસભ્ય રમેશ મિસ્ત્રી, દુષ્યંત પટેલ,ભાજપ જિલ્લા પ્રમુખ મારૂતિસિંહ અટોદરિયા, નીરલ પટેલ, રાષ્ટ્રીય સ્વયંસેવક સંઘના બળદેવ, વિજય અગ્રવાલ વગેરે મહાનુભાવો ઉપસ્થિત રહ્યા હતા. બહેનોના વિભાગમાં જાણીતા શિક્ષણવિદ અને જામનગરના રાણીબા એકતાબેન સોઢા તથા અન્ય મહિલા આગેવાનો ઉપસ્થિત રહ્યા હતા.હરિપ્રબોધમ ફાઉન્ડેશનના પ્રમુખ વિઠ્ઠલદાસ પટેલ સાથે સત્સંગના અલગ અલગ પ્રદેશોમાંના પ્રમુખોમાં  અમેરિકાના લલિત પટેલ, કેનેડાના જનક પટેલ, યુકેના જતીન શાહ, જર્મનીના મેન્ફ્રેન્ડ ગુથેઇન્સ વગેરે ઉપસ્થિત રહ્યા હતા.

જયારે કેન્દ્રીય મંત્રી નીતિન ગડકરીએ વિડીયો સંદેશ દ્વારા મહોત્સવને બિરદાવ્યો હતો.

મહોત્સવના ઉપક્રમે સત્સંગના ૧૨ જેટલા પ્રાદેશિક કેન્દ્રો પર અલગ અલગ તારીખોએ થેલેસેમિયા પીડિત બાળકોની સેવાર્થે બ્લડ ડોનેશન કેમ્પનું પણ આયોજન કરવામાં આવ્યું હતું.જે અંતર્ગત કુલ 5000 જેટલા યુનિટ બ્લડ એકત્ર કરવામાં આવ્યું હતું.