દાહોદ : ફતેપુરા-ગોંડલ રૂટની એસટી. બસના ચાલકની કરતૂત, દારૂ ઢીંચવા 10 KM દૂર બસ ભગાવી મુકી..!

• ફતેપુરા-ગોંડલ રૂટની એસટી. બસના ચાલકની કરતૂત

• કોઈને જાણ કર્યા વગર ચાલકે બસ ભાગાવી મુકી હતી

• દારૂ ઢીંચવા માટે ચાલક બસને 10 કીમી દૂર લઈ ગયો

• એસટી. બસ સાથે જ ચાલક નશાની હાલતમાં મળ્યો

• પોલીસે ગુન્હો નોધી કાયદેસરની કાર્યવાહી હાથ ધરી

દાહોદ જિલ્લાના ફતેપુરામાંથી ચોંકાવનારી ઘટના સામે આવી છે. ગોંડલ રૂટની એસટી. બસના ચાલકે કોઈને જાણ કર્યા વગર દારૂ ઢીંચવા માટે એસટી. બસને 10 કીમી દૂર ભગાવી મુકી હતી, ત્યારે એસટી. બસ સાથે જ બસનો ચાલક પણ નશાની હાલતમાં મળી આવતા પોલીસે ગુન્હો દાખલ કર્યો છે.

નામ પૂરતા જ કહેવાતા ગાંધીના ગુજરાતમાં દારૂની હાટડીઓ સરેઆમ ધમધમી રહી છે. દારૂબંધી ફક્ત નામ પુરતી હોય તેમ લાગી રહ્યું છે. કારણે કે, ક્યારે ચણા-મમરા વેચતા હોય તેમ દારૂ વેચતા હોવાના વીડિયો સામે આવે છે, તો ક્યારે જાહેરમાં લોકો દારૂ ઢીંચતા હોવાના વીડિયો પણ વાયરલ થાય છે. હવે, તો સરકારી બાબુઓ પણ ચાલુ ફરજ દરમિયાન નશાની હાલતમાં ઝડપાય છે, ત્યારે દાહોદ જિલ્લાના ફતેપુરાથી ગોંડલ રૂટની એસટી. બસના ચાલકની કરતૂત સામે આવી છે. આ એસટી બસનો ચાલક કોઈને જાણ કર્યા વગર દારૂ પીવા માટે 1, 2 નહીં પણ 10 કિલોમીટર દૂર સુધી એસટી. બસને લઈ પહોચી ગયો હતો.

જાણવા મળ્યા મુજબ, એસટી. બસ ઉપાડવાના સમયને વાર હતી, ત્યારે કંડકટર રેસ્ટ રૂમમાં આરામ કરતો હતો, જ્યારે ચાલક એસટી. બસ લઈને પલાયન થઈ ગયો હતો. જોકે, કંડક્ટરને બસ સ્ટેશનમાં બસ ન હોવાની જાણ થતાં ઉપરી અધિકારીઓને માહિતી આપી હતી. સમગ્ર મામલે એસટી. વિભાગના અધિકારીઓએ પોલીસને જાણ કરી બસ શોધવા નીકળ્યા હતા, ત્યાં તો ફતેપુરાથી 10 કિલોમીટર દૂર બટકવાડા ખાતેથી એસટી. બસ મળી આવી હતી. તો બીજી તરફ, બસનો ચાલક પણ નશાની હાલતમાં મળી આવતા પોલીસે ગુન્હો નોધી આગળની કાર્યવાહી હાથ ધરી છે.