દાહોદ : પાલિકાના ચીફ ઓફિસર સાથે થયેલ મારામારીનો મામલો, 3 પાલિકાના કર્મચારીઓની હડતાળ..!

થોડા દિવસો અગાઉ દાહોદ નગરપાલિકાના ચીફ ઓફિસર સાથે મારામારીની ઘટના સામે આવી હતી, ત્યારેક આ મામલે જિલ્લાની 3 નગરપાલિકાના કર્મચારીઓએ હડતાળ યોજી વિરોધ દર્શાવ્યો હતો.

મળતી માહિતી અનુસાર, દાહોદ નગરપાલિકાના ચીફ ઓફિસર યશપાલસિંહ વાઘેલા તેમજ દાહોદ નગરપાલિકાના પ્રમુખ રીના પંચાલના પતિ ધમુ પંચાલ વચ્ચે મારામારીની ઘટના બની હતી. આ ઘટનાને લઈને પોલીસ મથક ખાતે ફરિયાદ નોંધાવા પામી છે, ત્યારે દાહોદ પાલિકા, ઝાલોદ પાલિકા તેમજ દેવગઢબારિયા પાલિકાના કર્મચારીઓએ આ મામલે વિરોધ નોંધાવી હડતાળ પર ઉતર્યા છે. ત્રણેય નગરપાલિકાના કર્મચારીઓએ પાલિકાના મુખ્ય દ્વારને તાળા મારી કચેરી બહાર વિરોધ દર્શાવ્યો હતો. બીજીવાર વહીવટી કર્મચારીઓ સાથે મારામારીની ઘટના ન બને તેને લઈને તેઓ હડતાળ ઉપર ઉતર્યા છે. જોકે, આવી ઘટનાઓ બનતી અટકવી જોઈએ તેવી પાલિકા કર્મીઓએ માંગ કરી હતી. તો બીજી તરફ, કર્મચારીના મહામંડળના પ્રમુખ-ઉપપ્રમુખ પણ દાહોદ ખાતે દોડી આવ્યા હતા. કર્મચારી મહામંડળ સાથે બેઠકો યોજી યોગ્ય નિર્ણય લેવા અંગે રજૂઆત કરવામાં આવી હતી. જો આ પ્રશ્નનું કોઈ નિરાકરણ નહીં આવે તો આગામી દિવસોમાં માસ સીએલ ઉપર ઉતરવાની ત્રણેય પાલિકાના કર્મચારીઓએ ચીમકી ઉચ્ચારી છે.