ગીર સોમનાથ : પ્રસિદ્ધ અભિનેત્રી કંગના રનૌતએ શ્રી સોમનાથ મહાદેવના દર્શન કરી ધન્યતા અનુભવી...

ફિલ્મ અભિનેત્રી કંગના રનૌત પહોંચી સોમનાથ મંદિર

શ્રી સોમનાથ મહાદેવના દર્શન કરી જળાભિષેક કર્યો

શ્રીરામમંદિર ખાતે રામનામ મંત્ર લેખન યજ્ઞમાં જોડાય

રાષ્ટ્રીય એવોર્ડ વિજેતા પ્રસિદ્ધ અભિનેત્રી કંગના રનૌત સોમનાથ ખાતે આવી બાબા ભોલેનાથના દર્શન કર્યા હતા અને શ્રી સોમનાથ ટ્રસ્ટના શ્રીરામમંદિર ખાતે રામનામ મંત્ર લેખન યજ્ઞમાં જોડાઇ હતી. બોલિવુડની ફેમસ અભિનેત્રી કંગના રનૌત સોમનાથ મહાદેવના દર્શને આવી પહોચી હતી. તેઓએ પ્રથમ જ્યોતિર્લિંગ શ્રી સોમનાથ મહાદેવના દર્શન કરી પૂજા સામગ્રી અર્પણ કરી હતી તેમજ મહાદેવનો જલાભિષેક કર્યો હતો. સોમનાથ ટ્રસ્ટ તરફથી મુખ્ય પૂજારીશ્રી દ્વારા ચંદન તિલક કરીને ખેસ ઓઢાડી તેઓને આશીર્વાદ આપવામાં આવ્યા હતા.

તેમજ સોમનાથ મહાદેવનો પ્રસાદ આપવામાં આવ્યો હતો. દેશના પ્રધાનમંત્રી અને શ્રી સોમનાથ ટ્રસ્ટના અધ્યક્ષ નરેન્દ્ર મોદી દ્વારા સૌપ્રથમ રામ નામ લખીને પ્રારંભ કરાયેલ રામ નામ લેખન યજ્ઞમાં પણ જોડાયા હતા. શ્રી રામ મંદિર ખાતે રામચંદ્ર પ્રભુના દર્શન કરીને તેઓએ રામ નામ મંત્ર લેખન કર્યું હતું. સોમનાથ ટ્રસ્ટ અને અધ્યક્ષ નરેન્દ્ર મોદીની કાર્ય પ્રણાલીની પ્રશંસા કરતા તેઓએ મંદિરની સ્વચ્છતા અને અનુશાસનને ધન્યવાદ આપ્યા હતા.