ગીર સોમનાથ: મેઘપુર ગામે બહેનને પ્રેમી સાથે જોઈ જતા ભાઈએ કરી સગી બહેનની હત્યા

ગીર સોમનાથ જિલ્લાના વેરાવળ તાલુકાના મેઘપુર ગામે 20 વર્ષીય સગા ભાઈએ પાલક માતાની મદદથી 15 વર્ષીય સગીર વયની બહેનને કૌટુંબીક સગા સાથે પ્રેમ સંબંધ હોવાની શંકા રાખી હત્યા કરતા ચકચાર મચી જવા પામી છે

ગીર સોમનાથ જિલ્લાના વેરાવળ તાલુકાના મેધપુર ગામે જરીના કાતીયારના ધરના ફળીયામાં એક સગીર યુવતીની લાશ પડી હોવાની જાણ થતાં પોલીસ અધિકારીઓ સ્ટાફ સાથે ઘટનાસ્થળે દોડી જઈ તપાસ હાથ ધરતા સગીરા સલમા નુરમહમદ કાતીયાર હોવાનું અને બારેક વર્ષ પૂર્વે તેણીના માતા પિતાનું અવસાન થયા બાદ સંબંધી જરીના કાતીયાર સાથે મેધપુરમાં જ જે ઘરેથી લાશ મળી ત્યાં જ રહેતી હતી. જેથી પોલીસે પ્રથમ સલમાના મૃત્યુ અંગે જરીનાબેનની પુછપરછ કરતા તેઓ ઘટનાની રાત્રીના પ્રભાસ હોસ્પીટલ ખાતે પોતાના સંબંધી દાખલ હોય ત્યાં હોવાથી કશું જાણતા ન હોવાનું જણાવતા હતા. જયારે પાડોશીઓને પણ કઈ ખબર ન હોવાનું પુછપરછ કરતા જાણવા મળેલ હતુ. જો કે, સગીરાનો મૃતદેહ જોતા હત્યા કરાઈ હોવાનું પ્રાથમિક દ્રષ્ટીએ જણાતુ હતુ.પોલીસે આ મામલે જણાવ્યુ હતું કે મૃતક સગીરા સલમાની હત્યા તેના 20 વર્ષીય સગા ભાઈ સિકંદર નુરમહમદ કાતીયારએ પાલક માતા જરીનાબેન કાતીયારની મદદથી કરી છે. કારણ કે, મૃતક સલમાને તેના કૌટુંબિક સગા ઇસ્માઇલ ઉર્ફે ભાભલા સાથે પ્રેમ સંબંધ હોવાની શંકા હતી. બે દિવસ પૂર્વે ઘટનાની રાત્રીના ઇસ્માઇલ ઉર્ફે ભાભલો મૃતક સલમાના ઘરની અગાસી ઉપર જોવા મળતા તેને શબક શિખડાવવા માટે સિકંદર અને જરીનાબેનએ પ્રથમ ભાભલાને મુઢ માર મારતા તે નાસી ગયો હતો. બાદમાં બંન્નેએ સલમાને આડેધડ ઢીકાપાટુનો તેમજ પટ્ટા- લાકડી વડે ક્રૂરતાપૂર્વક મારમારી પીલોર સાથે માથુ ભટકાડી હત્યા નિપજાવી હતી. બાદમાં બંન્નેએ સલમાને છાપરા નીચેથી સલમાના મૃતદેહને ઢસડીને ઘરની ઓસરીમાં લઈ મુકી દીધી હતી.પોલીસે આ મામલે ગુનો નોંધી તપાસ શરૂ કરી છે