જુનાગઢ : ખાનગી બેન્કના કર્મચારીએ ગ્રાહક સાથે કરી લાખો રૂપિયાની છેતરપિંડી, પોલીસે તપાસ શરૂ...

જુનાગઢ શહેરની ખાનગી બેન્કના કર્મચારીએ ગ્રાહક સાથે લાખો રૂપિયાની છેતરપિંડી આચરી હોવાનો કિસ્સો પ્રકાશમાં આવતા પોલીસે વધુ તપાસ હાથ ધરી છે.

મળતી માહિતી અનુસાર, જુનાગઢ શહેરના રાજલક્ષ્મી રોડ પર આવેલ ખાનગી બેન્કના કર્મચારી રાજ મણિયારે બેન્કના જ ગ્રાહક સાથે રૂપિયા 15.25 લાખની છેતરપિંડી કરી હોવાનો કિસ્સો પ્રકાશમાં આવતા ચકચાર મચી જવા પામી છે. જેમાં ફરીયાદી ગ્રાહક નયન સૌસાણીએ અલગ અલગ સમયે રૂપિયા 15.25 લાખની ફીક્સ ડિપોઝિટ જમા કરાવી હતી. જેમાં વ્યાજ સાથેની રકમ રૂ. 18.28 લાખ જેટલી થતી હતી. જોકે, આરોપી બેન્ક કર્મચારીએ ફરીયાદીના મોબાઈલમાંથી નેટ બેન્કિંગ મારફતે ફીક્સ ડિપોઝિટ તોડીને તે રકમ પોતાના એકાઉન્ટમાં જમા કરાવી દીધી હતી. આરોપીએ બેન્ક એકાઉન્ટ મેન્ટેનન્સ ચાર્જ ભરવો ન પડે તેવું બહાનું બતાવીને ફરીયાદી ગ્રાહક પાસેથી સહીવાળો ચેક પણ મેળવી લીધો હતો, ત્યારે સમગ્ર મામલે ગ્રાહકે છેતરપિંડી આચારનાર બેન્ક કર્મચારી વિરૂધ્ધ ફરીયાદ નોંધાવતા પોલીસે આગળની કાર્યવાહી હાથ ધરી છે.