ધનતેરસના દિવસે જ ધાન ઉત્પાદકો મુશ્કેલીમાં મુકાયા

રાપરની સહકારી મંડળીમાં ફરી ખાતરની અછત સર્જાય

ખાતરની અછતના કારણે અનેક ખેડૂતો હલાકીમાં મુકાયા

ખેડૂતોએ હોબાળો મચાવતા ખાતર વિતરણ અટકી પડ્યું

ખાતરની અછત પ્રત્યે યોગ્ય નિવારણ લવાય તે જરૂરી

કચ્છ જિલ્લાના મુખ્ય મથક રાપર સ્થિત વાગડ વિવિધ સહકારી મંડળી ખાતે ફરી એક વખત ખાતરની અછત સર્જાતા અનેકધાન ઉત્પાદકોહેરાન પરેશાન થઈ ઉઠ્યા હતા.

કચ્છ જિલ્લાના રાપર તાલુકામાં કુલ 18 સહકારી મંડળી મારફતે ખાતર વિતરણ થાય છે, અને ત્યારબાદ બાકી રહેતા ખેડૂતો રાપર સહકારી મંડળી ખાતેથી ખાતર મેળવતા હોય છે. પરંતુ અહીં અપૂરતો જથ્થો મળતો હોવાથી હવે ખાતર વિહોણા ખેડૂતો પોતાની ધીરજ ગુમાવી રહ્યા છે. તેવામાં આજે ધનતેરસના દિવસે જ ધાન ઉત્પાદકો ભારે મુશ્કેલીમાં મુકાયા હતા. જેમાં ડીએપી ખાતર મેળવવા ખેડૂત ભાઇ-બહેનો વહેલી સવારથી કતારોમાં ગોઠવાયા હતા. જોકે, ખાતર મેળવવા પડાપડી થતાં પોલીસ બોલાવવી પડી હતી, અને પરિસ્થિતિ કાબુ બહાર જતા ખાતર વિતરણ પણ અટકી પડ્યું હોવાનું જાણવા મળ્યું છે. તો બીજી તરફ, આ અંગે વાગડ સેવા સહકારી મંડળીના મેનેજરે ખાતરની તંગી હોવાનો સ્વીકાર કરતા જણાવ્યું હતું કે, ખેડૂતોને શિયાળુ વાવેતર માટે એક માસનો સમય મળતો હોય છે, ત્યારે સ્વાભાવિક ખાતરની માંગ રહેવાની છે, ત્યારે અત્યાર સુધી માત્ર 30 ટકા જેટલો કુલ જથ્થો જ મળવા પામ્યો છે. અત્રે ઉલ્લેખનીય છે કે, આ સ્થિતિમાં ખાતર વિતરણ કરવું પણ અશક્ય બની ગયું છે, ત્યારે ખાતરની અછત પ્રત્યે જવાબદારો દ્વારા યોગ્ય નિવારણ લાવવામાં આવે તે જરૂરી બન્યું છે.