• નવસારી કૃષિ યુનિવર્સિટી દ્વારા યોજાયું અનોખું પ્રદર્શન

• કેરીની દુર્લભ જાત માટે સ્પર્ધા અને પ્રદર્શન યોજાયું

• 125 પ્રકારની કેરી પ્રદર્શનમાં મુકવામાં આવી

• કેરી સ્પર્ધા અને પ્રદર્શન લોકોમાં જમાવ્યું આકર્ષણ

• સ્પર્ધામાં વિજેતા ખેડૂતોને સન્માનિત કરવામાં આવ્યા 

નવસારી કૃષિ યુનિવર્સિટી દ્વારા કેરીની દુર્લભ જાતો માટે સ્પર્ધા અને પ્રદર્શન યોજાયું હતું. જેમાં 125 પ્રકારની અવનવી કેરી પ્રદર્શનમાં મુકવામાં આવી હતી.અને આ પ્રદર્શન લોકો માટે આકર્ષણનું કેન્દ્ર બન્યું હતું.

વિશ્વ આખા પર ગ્લોબલ વોર્મિંગે ચિંતાનું આવરણ સર્જી દીધું છે.બદલાયેલા ઋતુચક્રએ  ખેતીના વ્યવસાય માટે ચિંતાજનક પરિસ્થિતિ સર્જી દીધી છે.જેની સીધી અસર ખેતપેદાશ પર જોવા મળી રહી છે. હાલમાં ઉનાળામાં કેરીની સીઝન જોરમાં હોય છે. પરંતુ બદલાયેલા વાતાવરણની અસરથી આંબાનો પાક પણ બચી શક્યો નથી.ત્યારે ગ્લોબલ વોર્મિંગ સામે ઝીંક ઝીલી શકે અને કોઈ પણ પ્રતિકૂળ પરિસ્થિતિમાં ગુણવત્તા યુક્ત ઉત્પાદન આપી શકે એવી કેરીની જાતને ખેડૂત અપનાવે એવા ઉમદા હેતુથી નવસારી કૃષિ યુનિવર્સિટી દ્વારા સેન્ટ્રલ એક્ઝામિનેશન હોલ બહાર કેરીની સ્પર્ધા અને પ્રદર્શનનું આયોજન કરવામાં આવ્યું છે.

આ પ્રસંગે કુલ 125 પ્રકારની કેરીનું પ્રદર્શન કરવામાં આવ્યું હતું.જેમાં ગુજરાત સહિત નવસારી કૃષિ યુનિવર્સિટીમાં સ્થાનિક 70 કેરી અને વિદેશી બ્રાન્ડની 15 કેરીઓ સહિત કેરીનું પ્રદર્શન યોજવામાં આવ્યું છે. આ પ્રદર્શનને કૃષિ યુનિવર્સિટીના વાઇસ ચાન્સેલર ઝીણા પટેલના હસ્તે ખુલ્લુ મુકવામાં આવ્યું હતું.આ પ્રદર્શનમાં કેરીની અવનવી જાત લોકોમાં આકર્ષણનું કેન્દ્ર બની હતી.