નવસારી : આંબાવાડીની સુરક્ષા માટે ખેડૂતોની માંગ,કેરી ચોરીની ફરિયાદ ઉઠતા ધરતીપુત્રો ચિંતાગ્રસ્ત

• નવસારીમાં કેરી ચોરીની ઉઠી ફરિયાદ

• 10થી વધુ ગામોમાં કેરી ચોરીની ફરિયાદ

• એક જ દિવસમાં 100 મણ કેરીની થઇ ચોરી  

• આંબાવાડીમાં કેરી ચોરીથી ખેડૂતો ચિંતિત

• જિલ્લા કલેક્ટર સમક્ષ સુરક્ષાની કરી માંગ

નવસારી જિલ્લાના પૂર્વ પટ્ટીમાં કેરી ચોરો સક્રિય થતા ખેડૂતોની ઉંઘ  ઉડી ગઈ છે. એક જ દિવસમાં 100 મણ જેટલી કેરી ચોરીની આશંકાએ ખેડૂતો સરકાર પાસે સુરક્ષાની માંગ કરી રહ્યા છે.

નવસારી જિલ્લામાં કેરીના પાકનું આગમન થઈ ચૂક્યું છે.સમગ્ર જિલ્લામાં કેસર કેરીની આવક એપીએમસી માર્કેટમાં થઈ રહી છે. એક મણના એટલે કે 20 કિલોના 1800થી લઈને 2800 રૂપિયા સુધીનો ભાવ બોલાઈ રહ્યો છે. કેરીનો પાક ઓછો ઉતરવાના કારણે ભાવો આસમાને પહોંચ્યા છે. નવસારી જિલ્લાની પૂર્વ પટ્ટીમાં 10થી વધુ ગામોમાં કેરી ચોરો સક્રિય થયા છે. મોંઘા ભાવે વેચાતી કેરી ચોરી કરીને સસ્તા ભાવે વેચવાનું રેકેટ શરૂ થયું છે.જેને લઇને ખેડૂતોએ ભેગા મળીને નવસારી જિલ્લા કલેકટરને આવેદનપત્ર આપીને પોતાની મોંઘી અને ઓછી ઉતરેલી કેરીઓની સુરક્ષા માટે પોલીસ પેટ્રોલિંગ કરવામાં આવે તેવી માંગ ખેડૂત સમાજના અગ્રણીઓ કરી રહ્યા છે.

કેરીના આસમાને પહોંચેલા ભાવોના કારણે સક્રિય થયેલા કેરી ચોર ટોળકીઓ સ્થાનિક વજન કાંટા લઈને કેરી ખરીદતા વેપારીઓને વેચી રહ્યા હોવાનું ખેડૂતો ફરિયાદ કરી રહ્યા છે. કેરી ચોરોને ડામવા માટે પરવાનગી વિના અથવા તો એપીએમસીના લાયસન્સ વિના કેરી ખરીદનાર સામે કાર્યવાહી કરવામાં આવે અને વાડી વિસ્તારમાં પેટ્રોલિંગ વધારવામાં આવે તેવી માંગ કરવામાં આવી રહી છે.