જુનાગઢ : પોરબંદર હાઇવે પર પકડાયેલા વિદેશી દારૂની ઘટનામાં પોલીસકર્મીની સંડોવણી આવી બહાર, કોન્સ્ટેબલ સહિત ચારની ધરપકડ

• એલસીબીએ પકડેલા વિદેશી દારૂની ટ્રકનો મામલો

• સાત દિવસ પહેલા 48.90 લાખનો પકડાયો હતો દારૂ

• પોલીસ તપાસમાં ચોંકાવનારી હકીકત આવી બહાર

• પોલીસ કોન્સ્ટેબલની સંડોવણી આવી બહાર

• એલસીબીએ પોલીસકર્મી સહિત ચારની કરી ધરપકડ    

જૂનાગઢ જિલ્લા લોકલ ક્રાઇમ બ્રાન્ચ દ્વારા એક સપ્તાહ અગાઉ પોરબંદર-માંગરોળ હાઇવે પરથી વિદેશી દારૂની ટ્રક ઝડપી લીધી હતી,જે ઘટનામાં પોલીસકર્મીની સંડોવણી બહાર આવતા એલસીબીએ પોલીસ કોન્સ્ટેબલ સહિત ચાર લોકોની ધરપકડ કરી હતી.

જૂનાગઢ જિલ્લા લોકલ ક્રાઇમ બ્રાન્ચ દ્વારા 4 ડિસેમ્બર 2025ના કરવામાં આવેલી દારૂ પકડવાની કાર્યવાહીના પડઘા હવે પોલીસ વિભાગમાં પડ્યા છે.LCBએ પોરબંદર-માંગરોળ હાઇવે પરથી યુપી પાર્સિંગના એક ટ્રકમાંથી સાત દિવસ પહેલા જ 48.90 લાખનો વિદેશી દારૂનો જથ્થો ઝડપી પાડ્યો હતો. દારૂ, ટ્રક અને મોબાઇલ ફોન મળીને પોલીસે કુલ 69 લાખનો મુદ્દામાલ કબજે કર્યો હતો. અને તેના બીજા જ દિવસે ફરી જુનાગઢ એલસીબીએ એ જ વિસ્તારમાંથી લાખોનો દારૂ ઝડપી પાડ્યો હતો.આ પ્રકરણમાં ઉત્તર પ્રદેશના ટ્રક ચાલક અફઝલઅલી સફાતઅલી મંસુરીની ધરપકડ કરીને તેની વિરુદ્ધ માંગરોળ મરીન પોલીસ સ્ટેશનમાં પ્રોહીબીશન એક્ટ મુજબ ગુનો દાખલ કરવામાં આવ્યો હતો.

જોકે, LCB દ્વારા ટ્રક ડ્રાઇવરની ઉંડાણપૂર્વક પૂછપરછ અને ટેકનિકલ સોર્સના આધારે હાથ ધરાયેલી તપાસમાં ગંભીર હકીકત ખુલી હતી. આ દારૂના રેકેટમાં જે પોલીસ સ્ટેશનમાં આ ગુનો દાખલ થયો હતો, તે જ માંગરોળ મરીન પોલીસ સ્ટેશનના એક પોલીસ કોન્સ્ટેબલની સંડોવણી સામે આવી હતી.

તપાસ દરમિયાન પોલીસને જાણવા મળ્યું કે, જે સમયે LCBએ દારૂ ભરેલો ટ્રક રોક્યો હતો, તે જ સમયે ડ્રાઇવરનો મોબાઇલ ફોન સ્વીચ ઓફ થઈ ગયો હતો. આથી દારૂ મોકલનાર વ્યક્તિ ટ્રક ડ્રાઇવરનો સંપર્ક કરી શક્યો નહીં.પરંતુ પોલીસ દ્વારા તલસ્પર્શી તપાસ કરવામાં આવતા સમગ્ર ઘટનામાં ચોંકવનારી હકીકત બહાર આવી હતી,અને એલસીબી દ્વારા પોલીસ કોન્સ્ટેબલ અતુલ દયાતર સહિત ચાર આરોપીઓની ધરપકડ કરી હતી,અને વધુ તપાસ શરૂ કરી હતી.