સાબરકાંઠા : અમેરિકા પ્રવાસે ગયેલ સાંસદના નિવાસ સ્થાને તસ્કરો ત્રાટક્યા, રૂ. 8.70 લાખના મત્તાની ચોરી

સાબરકાંઠા જીલ્લાના પ્રાંતિજ તાલુકાના ભાગપુર ખાતે રહેતા અને સાબરકાંઠા-અરવલ્લીના સાંસદ દિપસિંહ રાઠોડના નિવાસ સ્થાને તસ્કરો ત્રાટક્યા હતા. જેમાં રૂ. 8.70 લાખના માલમત્તાની ચોરી કરી તસ્કરો ફરાર થઇ જતા સાંસદના પુત્રએ પ્રાંતિજ પોલીસ મથકે ચોરી અંગે ફરિયાદ નોંધાવી છે.

સાબરકાંઠાના પ્રાંતિજ તાલુકાના ભાગપુર ખાતે આવેલ સાંસદ દિપસિંહ રાઠોડના નિવાસ સ્થાને તસ્કરો ત્રાટક્યા હતા. અમેરિકા પ્રવાસે ગયેલ સાંસદના નિવાસ સ્થાનમાં અજાણ્યા તસ્કરોએ દરવાજાનું તાળુ તોડી અંદર પ્રવેશ કર્યો હતોમ જ્યાં મકાનમાં રહેલ સર-સામાન વેર વિખેર કર્યો હતો, તો મકાનમાં રહેલ ૩ તિજોરીના તાળા તોડ્યા હતા.

જેમાંથી ચાંદીના સિક્કાઓ અને વાસણો સહિત સોનાના દાગીના, તિજોરીમાં રહેલ 1 લાખ રૂપિયા રોકડ રકમ સહિત કુલ કિંમત રૂ. 8.70 લાખના માલમત્તાની ચોરી કરી હતી. તો હાલ સાંસદ અમેરિકા ખાતે પ્રવાસમાં હોય ત્યારે તેમના પુત્રને ચોરી અંગેની જાણ થતા તેઓએ પ્રાંતિજ પોલીસ મથકે ફરિયાદ નોંધાવી છે, ત્યારે હાલ તો પ્રાંતિજ પોલીસે સાંસદના પુત્ર રણજીતસિંહની ફરિયાદના આધારે અજાણ્યા તસ્કરોનું પગેરું મેળવવા કવાયત હાથ ધરી છે.