• વલસાડ પોલીસને મેન્ટર પ્રોજેક્ટ હેઠળ મોટી સફળતા હાથ લાગી

• ઓફેન્ડર પર તેના મેન્ટર તરીકે પોલીસકર્મીની કરાય હતી નિમણૂંક

• SOG પોલીસે સતત વોચ ગોઠવી આરોપીની કરી લીધી છે ધરપકડ

• ગાંજાનો જથ્થો, 1 લાખ રોકડા, મોબાઈલ, લક્ઝુરિયસ કાર જપ્ત

• રૂ. 13 લાખથી વધુના મુદ્દામાલ સાથે એક ઈસમની ધરપકડ કરાય 

વલસાડ જિલ્લા પોલીસને મેન્ટર પ્રોજેક્ટ હેઠળ મોટી સફળતા હાથ લાગી છે. SOG પોલીસે ગાંજાનો જથ્થો, 1 લાખ રોકડા, મોંઘા મોબાઈલ સહિત લક્ઝુરિયસ કાર મળી રૂ. 13 લાખથી વધુના મુદ્દામાલ સાથે એક ઈસમની ધરપકડ કરી છે.

ડી.જી.પી. વિકાસ સહાયના આદેશ મુજબ સમગ્ર ગુજરાતમાં જુદા-જુદા ગુના કરનાર આરોપીઓની ઓળખ કરી દરેકને એક યુનિક આઈ.ડી. આપીને દરેક ઓફેન્ડર ઉપર તેના મેન્ટર તરીકે એક પોલીસકર્મીની નિમણૂંક કરવામાં આવી છે. આ પોલીસકર્મીએ તે ઓફેન્ડરની સંપૂર્ણ ગતિવિધિ પર વોચ રાખી ફરીથી તે ગુનો ન કરે કે, કોઈ ગુનો કરવાની તૈયારી કરે તેની તકેદારી રાખવાની હોય છે. આ પ્રોજેક્ટ હેઠળ વલસાડ જિલ્લા પોલીસ દ્વારા કાર્યવાહી થઈ રહી છે.

આ કાર્યવાહી હેઠળ વલસાડ જિલ્લા એસઓજી પોલીસને  વાપીના ચણોદ વિસ્તારમાંથી 44 કિલોથી વધુનો ગાંજો ઝડપી પાડ્યો છે. આ સાથે જ 13 લાખથી વધુના મુદ્દામાલ સાથે એક આરોપીની ધરપકડ કરી છે. એસઓજી ટીમને મેન્ટર પ્રોજેક્ટ હેઠળ રામ અવતાર સુમન ગુપ્તા નામના આરોપી જે અગાઉ પણ NDPSના ગુનામાં ઝડપાયો હતો. જેને લઈને તેના ઉપર સતત વોચ રાખવામાં આવી હતી.

છેલ્લા ઘણા સમયથી આ આરોપીની શંકાસ્પદ હિલચાલને લઈને એસઓજી પોલીસ દ્વારા તેના પર નજર રાખવામાં આવી હતી. રેડ દરમિયાન ઘર બહાર લક્ઝૂરિયસ કારમાં તપાસ કરતા 2 ડ્રમમાં શંકાસ્પદ પદાર્થ ભરેલો હતો. જેની FSLની ટીમે તપાસ કરતાં ડ્રમમાં ભરેલો પદાર્થ ગાંજો હોવાનું બહાર આવ્યું હતું. આ મામલામાં પોલીસે 44 કિલો ગાંજાનો જથ્થો, રોકડા 1 લાખ રૂપિયા સહિત મોંઘા મોબાઈલ અને લક્ઝુરિયસ કાર મળી રૂ. 13 લાખથી વધુનો મુદ્દામાલ જપ્ત કર્યો છે.