• ઉમરગામ તાલુકાના ગંગાનગર વિસ્તારની ઘટના

• 18 વર્ષીય યુવાનને સાપ કરડતા પગમાં થઈ ઇજા

• યુવાન સાપને બરણીમાં લઈ સારવાર અર્થે પહોચ્યો

• સાપ ઝેરી હોવાનું જાણવા મળતા ચિંતાનો વિષય

• સિવિલ હોસ્પિટલના તબીબો દ્વારા સારવાર કરાય

વલસાડ જિલ્લાના ઉમરગામમાં 18 વર્ષીય યુવાનને સાપ કરડતા ઇજાગ્રસ્ત યુવાન સાપને બરણીમાં લઈ સિવિલ હોસ્પિટલ ખાતે સારવાર અર્થે પહોચ્યો હતો. જોકે, ડંખ મારનાર સાપ અત્યંત ઝેરી રસલ વાઈપર હોવાનું જાણવા મળતા ચિંતાનો વિષય બન્યો છે.

વલસાડ જિલ્લાના ઉમરગામ તાલુકાના ગંગાનગર વિસ્તારમાં પરેશભાઈની ચાલીમાં રહેતો 18 વર્ષીય શુભમ રામ નરેશ ગૌતમ પોતાના ઘર પાસે આવેલ એક દુકાનમાં ઘરવખરીનો સામાન લેવા માટે ગયો હતો, અને સામાન લઈને પરત ફરી રહ્યો હતો. તે દરમિયાન તેના જમણા પગમાં સાપે કરડી લીધું હોવાનો અહેસાસ થતાં તેણે તાત્કાલિક આસપાસના લોકોને ઘટનાની જાણ કરી હતી.

જોકે, આ સાપ યુવાનથી દૂર પહોંચે તે પહેલા સ્થાનિક યુવકોએ સાપને પકડી બરણીમાં પૂરી દીધો હતો. ત્યારબાદ યુવાનને પ્રાથમિક સારવાર આપવા ઉમરગામના ગાંધી વાડી ખાતે આવેલ પ્રાથમિક આરોગ્ય કેન્દ્ર ખસેડવામાં આવ્યો હતો, જ્યાં તેની વધુ સારવાર જણાતા 108 એમ્બ્યુલન્સ મારફતે વલસાડ સિવિલ હોસ્પિટલ ખસેડવામાં આવ્યો હતો.

ઇજાગ્રસ્ત યુવક તથા તેના ભાઈ અને મિત્રો સાપને બરણીમાં મુકી થેલામાં લઈ વલસાડ સિવિલ હોસ્પિટલ ખાતે આવી પહોંચ્યા હતા. અત્રે ઉલ્લેખનીય છે કે, જાણકારોએ આ સાપ અત્યંત ઝેરી રસલ વાઈપર હોવાનું જણાવતા યુવાન સહિત તેના મિત્રોના હોશ ઉડી ગયા હતા.