• શહેર તથા જિલ્લામાં વધતાં ચેન સ્નેચિંગના બનાવો

• ઘટનાઓમાં સતત વધારો નોંધાતા પોલીસ બની સક્રિય

• ચેન સ્નેચિંગને અંજામ આપનાર 2 શખ્સોની ધરપકડ

• ભિલાડ ચેકપોસ્ટ પાસેથી આરોપીઓને ઝડપી લેવાયા

• વલસાડ પોલીસે 2 બંદૂક સહિત 4 કારતૂસ જપ્ત કર્યા

વલસાડ શહેર તથા જિલ્લામાં ચેન સ્નેચિંગની ઘટનાઓમાં સતત વધારો નોંધાતા પોલીસ સક્રિય બની હતી. જેમાં ચેન સ્નેચિંગને અંજામ આપનાર 2 આરોપીઓની પોલીસે ધરપકડ કરી કાયદેસરની કાર્યવાહી હાથ ધરી છે.

વલસાડ પોલીસે ચેન સ્નેચિંગની ઘટનાઓમાં સક્રિય 2 આરોપીઓની ધરપકડ કરી કાયદેસરની કાર્યવાહી હાથ ધરી છે. આ આરોપીઓએ છેલ્લા એક મહિનામાં વલસાડ જિલ્લા અને સંઘ પ્રદેશમાં કુલ 7 ગુનાઓને અંજામ આપ્યો હતો. પોલીસની પ્રાથમિક તપાસમાં જાણવા મળ્યું કે, આરોપીઓ ઉત્તર પ્રદેશની જેલમાં એકબીજાના સંપર્કમાં આવ્યા હતા, અને ત્યારબાદ ગુજરાતમાં ચેન સ્નેચિંગની ઘટનાઓને અંજામ આપવા માટે વલસાડ આવ્યા હતા.

તાજેતરમાં તિથલ રોડ પર રાત્રે ચાલવા નીકળેલી 2 મહિલાઓ પૈકી એક મહિલાની સોનાની ચેન લૂંટવાનો પ્રયાસ કર્યો હતો. જોકે, સતર્ક મહિલાએ ચેન પકડી રાખતા આરોપીઓ માત્ર અડધી ચેન લઈને ભાગી છૂટ્યા હતા. જેમાં વલસાડ સીટી પોલીસે CCTV ફૂટેજ, ટેકનિકલ સર્વેલન્સ અને બાતમીદારોની મદદથી તપાસ શરૂ કરી હતી.

આરોપીઓની પૂછપરછમાં ખુલાસો થયો કે, તેઓ લગ્ન સિઝન દરમિયાન વિશેષ સક્રિય થતા હતા, અને લગ્ન પ્રસંગો તથા સગાઈ સમારંભમાં જતી વૃદ્ધ મહિલાઓને ટાર્ગેટ કરતા હતા.

આરોપીઓ પાસેથી 2 કટ્ટા અને 4 રાઉન્ડ કારતૂસ પણ મળી આવ્યા છે. આ ગેંગે છેલ્લા એક મહિનામાં 2 બાઈક ચોરી અને 2 ચેન સ્નેચિંગ સહિતના ગુન્હા આચર્યા હતા. વલસાડ LCB અને SOG પોલીસે ભિલાડ ચેકપોસ્ટ પાસેથી આરોપીઓને ઝડપી પાડ્યા હતા, અને ટ્રાન્સફર વોરંટ દ્વારા તેમનો કબજો મેળવી વધુ તપાસ હાથ ધરી છે.