અરવિંદ કેજરીવાલે કોંગ્રેસના વખાણ કર્યા, રાહુલને પત્રમાં લખ્યું : દાયકાઓ સુધી યાદ રહેશે..!

દિલ્હીના મુખ્યમંત્રી અરવિંદ કેજરીવાલે ફરી એકવાર રાષ્ટ્રીય અધ્યક્ષ મલ્લિકાર્જુન ખડગે, રાહુલ ગાંધી અને ડૉ. મનમોહન સિંહને પત્ર લખીને કોંગ્રેસનો આભાર માન્યો છે. આ પત્રમાં તેમણે દિલ્હી સર્વિસ બિલના વિરોધમાં મતદાન કરવા બદલ પાર્ટીનો આભાર માન્યો છે. આ સાથે કેજરીવાલે બંધારણ બચાવવામાં કોંગ્રેસને સમર્થન આપવાની પ્રતિબદ્ધતા વ્યક્ત કરી છે.

દિલ્હીના મુખ્યમંત્રી અરવિંદ કેજરીવાલે બુધવારે એક પત્ર લખીને કોંગ્રેસ અધ્યક્ષ મલ્લિકાર્જુન ખડગે, વાયનાડના સાંસદ રાહુલ ગાંધી અને પૂર્વ વડાપ્રધાન અને રાજ્યસભાના સભ્ય ડૉ. મનમોહન સિંહનો આભાર માન્યો છે. કેજરીવાલે લોકસભા અને રાજ્યસભામાં દિલ્હી સર્વિસ બિલના વિરોધમાં મતદાન કરવા બદલ કોંગ્રેસનો આભાર માન્યો છે. કેજરીવાલે અગાઉ પણ જ્યારે દિલ્હી સર્વિસ બિલ ગૃહમાં પસાર થયું, ત્યારે પ્રેસ કોન્ફરન્સ કરી હતી. તે પ્રેસ કોન્ફરન્સમાં, જ્યાં તેમણે આ બિલને કાળો કાયદો ગણાવ્યો, ત્યાં તેમણે બિલની વિરુદ્ધ મતદાન કરનારા તમામ પક્ષોનો આભાર માન્યો. તેમણે લખ્યું, 'હું દિલથી તમારી પ્રશંસા કરું છું. કારણ કે, તમે દિલ્હીના લોકોના બંધારણીય હિતોની સુરક્ષા માટે સંસદની બહાર અને અંદર તમારા શ્રેષ્ઠ પ્રયાસો કર્યા છે. મને આશા છે કે, બંધારણના સિદ્ધાંતોને બચાવવાની તમારી પ્રતિબદ્ધતા દાયકાઓ સુધી યાદ રહેશે. બંધારણને નબળું પાડનારાઓ સામે ચાલી રહેલી લડાઈમાં અમે તમારું સમર્થન કરવાનું ચાલુ રાખીશું.