ભારતીય સેનાનો વળતો પ્રહાર : પાકિસ્તાનના JF 17 અને F 16 સહિત ૩ ફાઈટર જેટ અને ૮ મિસાઈલ તોડી પાડ્યા

ભારત અને પાકિસ્તાન વચ્ચે નિયંત્રણ રેખા (LOC) અને આંતરરાષ્ટ્રીય સરહદ પર તણાવ ચરમસીમાએ પહોંચી ગયો છે. પાકિસ્તાન દ્વારા ભારતીય ક્ષેત્રમાં ઘૂસણખોરી અને હુમલાના પ્રયાસો સતત ચાલુ છે,

પરંતુ ભારતીય સેના અને વાયુ સંરક્ષણ પ્રણાલી તેનો જડબાતોડ જવાબ આપી રહી છે. તાજેતરમાં ભારતીય સેનાએ પાકિસ્તાનના ફાઈટર જેટ અને મિસાઈલોને તોડી પાડીને પાકિસ્તાનના હુમલાના પ્રયાસોને નિષ્ફળ બનાવ્યા હતા.

ભારતીય સેના દ્વારા લેવાયેલા કડક પગલાંમાં, બે પાકિસ્તાની JF 17 ફાઇટર જેટ તોડી પાડવામાં આવ્યા છે. આ ઉપરાંત, એક F 16 ફાઇટર જેટ સહિત પાકિસ્તાનના કુલ ત્રણ ફાઈટર જેટ ભારતીય સેના દ્વારા તોડી પાડવામાં આવ્યા છે. ભારતે પાકિસ્તાન દ્વારા છોડવામાં આવેલી આઠ મિસાઇલોને પણ સફળતાપૂર્વક તોડી પાડી છે. ભારતીય સેનાની આ કાર્યવાહીએ પાકિસ્તાનના ભારતીય ક્ષેત્રમાં હુમલો કરવાના મોટા પ્રયાસને નિષ્ફળ બનાવ્યો છે. 

પાકિસ્તાને ભારતના અનેક સંવેદનશીલ સ્થળોને ડ્રોન અને અન્ય માધ્યમો દ્વારા નિશાન બનાવવાનો પ્રયાસ કર્યો. જમ્મુ એરપોર્ટ, જમ્મુ રેલ્વે સ્ટેશન, ચન્ની હિંમત અને જમ્મુને અડીને આવેલા સરહદી વિસ્તાર આરએસપુરા જેવા સ્થળોએ પાકિસ્તાને ડ્રોન હુમલાનો પ્રયાસ કર્યો. પાકિસ્તાની સેનાએ જમ્મુમાં ચન્ની હિંમત, આરએસપુરા અને રેલ્વે સ્ટેશન પર હુમલો કરવાનો પણ નિષ્ફળ પ્રયાસ કર્યો. ભારતીય સેનાએ આ તમામ પ્રયાસોને નિષ્ફળ બનાવ્યા. જમ્મુ યુનિવર્સિટી નજીક બે પાકિસ્તાની ડ્રોન મળી આવ્યા હતા, જેને ભારતીય વાયુ સંરક્ષણ પ્રણાલી દ્વારા તોડી પાડવામાં આવ્યા હતા. ભારતની અત્યાધુનિક વાયુ સંરક્ષણ પ્રણાલી S 400 એ પાકિસ્તાનના આ હુમલાના પ્રયાસોને સફળતાપૂર્વક રોક્યા.