બિહારના ભોજપુરમાં ચોંકાવનારી ઘટના, પિતાએ બાળકો સાથે ઝેરના ઘુંટ પીધા,ત્રણના મોત

બિહારના ભોજપુર જિલ્લાના બિહિયા પોલીસ સ્ટેશન વિસ્તારના બેલવાનિયા ગામમાં એક દર્દનાક ઘટના સામે આવી છે. એક પિતાએ તેના ચાર બાળકો સાથે ઝેર પી લીધું હતું, જેના કારણે ત્રણ માસૂમ બાળકોના મોત થયા હતા, જ્યારે પિતા અને એક બાળક જીવન-મરણ વચ્ચે ઝઝૂમી રહ્યા હતા.

આ દુર્ઘટના બાદ સમગ્ર ગામમાં શોકનો માહોલ છે. સ્થાનિક લોકોનું કહેવું છે કે મૃતકની પત્નીનું ગયા વર્ષે અવસાન થયું હતું, ત્યારબાદ તે માનસિક તણાવમાં હતો. ડિપ્રેશનના કારણે તેણે આ આત્મઘાતી પગલું ભર્યું હોવાનું મનાય છે.

સૂત્રોના જણાવ્યા અનુસાર, વ્યક્તિએ પહેલા તેના ચાર બાળકોને ઝેર ખવડાવ્યું અને પછી પોતે ઝેર ખાઈ લીધું હતું. જ્યારે પરિવારના અન્ય સભ્યોને આ ઘટનાની જાણ થઈ ત્યારે તમામને તાત્કાલિક સદર હોસ્પિટલમાં લઈ જવામાં આવ્યા હતા. ડોક્ટરોએ ત્રણ બાળકોને મૃત જાહેર કર્યા, જ્યારે પિતા અને એક બાળકની સારવાર ચાલી રહી છે.