વિરાટ કોહલીના એક શોટે કરોડો ચાહકોના દિલ તોડયા, જાડેજા પણ નિરાશ..!

ધર્મશાલામાં વિરાટ કોહલી 95 રન પર બેટિંગ કરી રહ્યો હતો. વિરાટની ODI ક્રિકેટમાં 49મી સદી આવવાની હતી. સ્ટેડિયમમાં હાજર દરેક ચાહક તેની આતુરતાથી રાહ જોઈ રહ્યા હતા. દરેકના ફોન પરના કેમેરા ખુલ્લા હતા અને દરેક જણ વર્ષોથી આ ઐતિહાસિક ક્ષણને કેદ કરવા માંગતા હતા.

કિંગ કોહલી ODI ક્રિકેટમાં સચિન તેંડુલકરના 49 સદીના વર્લ્ડ રેકોર્ડની બરોબરી કરવાની અણી પર હતો. બીજા છેડે વિરાટની સાથે ક્રિઝ પર રહેલા રવીન્દ્ર જાડેજા પણ ખૂબ જ ઉત્સુક હતા અને તે છેલ્લી ઘણી ઓવરોથી કોહલીને સ્ટ્રાઇક પર લાવવા માટે દરેક શક્ય રીતે પ્રયાસ કરી રહ્યા હતા.

મેટ હેનરી ઇનિંગ્સની 48મી ઓવર ફેંકી રહ્યો હતો અને તેણે ઓવરનો ચોથો બોલ ઓફ સ્ટમ્પની બહાર ફેંક્યો. પોતાની 49મી સદીના અનુસંધાનમાં વિરાટ કોહલીએ મોટો શોટ મારવાનો પ્રયાસ કર્યો અને બોલને હવામાં રમ્યો. ચાહકોથી લઈને સમગ્ર ભારતીય ડ્રેસિંગ રૂમ સુધીની તમામની નજર બોલ ક્યાં ઉતરશે તેના પર હતી. જો કે, વિરાટે શોટ રમ્યો કે તરત જ તે સમજી ગયો કે બધી મહેનત વ્યર્થ ગઈ.

કોહલીના બેટમાંથી નીકળેલો બોલ ગ્લેન ફિલિપ્સના હાથમાં ગયો હતો. મેદાન પર સંપૂર્ણ મૌન હતું અને કોઈ માનવા તૈયાર નહોતું કે કોહલી 95 રન બનાવીને પેવેલિયન પરત ફરી રહ્યો છે. એટલે કે સચિનના મહાન રેકોર્ડની બરાબરી માત્ર 5 રન દૂર રહી હતી. વિરાટ પોતે પેવેલિયન પરત ફરતી વખતે નિરાશ થયો હતો.