ભારતીય ટીમને મોટો ઝટકો... શ્રેયસ ઐયર ICUમાં દાખલ, ઓસ્ટ્રેલિયા સામેની મેચમાં કેચ પકડતાં ઇન્જર્ડ થયો હતો

ભારતીય બેટ્સમેન શ્રેયસ ઐયરને સિડનીની એક હોસ્પિટલમાં દાખલ કરવામાં આવ્યો છે અને તે ICUમાં છે. ઓસ્ટ્રેલિયા સામેની ત્રીજી ODI દરમિયાન પાંસળીમાં ઈજા થયા બાદ ઐયરને ICUમાં દાખલ કરવામાં આવ્યો હતો.

મેચ દરમિયાન, ઐયર એલેક્સ કેરીનો શાનદાર કેચ પકડવા માટે પાછળની તરફ દોડ્યો. તેણે કેચ પકડ્યો, પરંતુ તેની ડાબી પાંસળીમાં ઈજા થઈ. ડ્રેસિંગ રૂમમાં પાછા ફર્યા પછી, તેને ભારે દુખાવો અને અસ્વસ્થતાનો અનુભવ થયો, જેના કારણે તેને તાત્કાલિક હોસ્પિટલમાં લઈ જવામાં આવ્યો. PTIના અહેવાલ મુજબ, ઐયરને આંતરિક રક્તસ્ત્રાવ થયો અને તેને ICUમાં દાખલ કરવામાં આવ્યો છે. એક સૂત્રએ જણાવ્યું કે શ્રેયસ છેલ્લા બે દિવસથી ICUમાં છે. તપાસમાં આંતરિક રક્તસ્ત્રાવ જોવા મળ્યો, જેના કારણે તેને તાત્કાલિક દાખલ કરવો પડ્યો. ચેપ ફેલાતો અટકાવવા માટે તેમને 2 થી 7 દિવસ સુધી નિરીક્ષણ હેઠળ રાખવામાં આવશે.