Hardik-Natasha Wedding : જયપુરમાં હાર્દિક-નતાશાના લગ્ન, વિરાટ સહિત અનેક ક્રિકેટર્સ હાજરી આપશે

ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યા અને મોડલ નતાશા સ્ટેનકોવિક ફરી એકવાર લગ્ન કરવા જઈ રહ્યા છે. આ કપલે 2020માં કોરોના મહામારીને કારણે ખૂબ જ સાદગીપૂર્ણ રીતે લગ્ન કર્યા હતા. સોમવારથી ઉદયપુરમાં હાર્દિક અને નતાશાના લગ્નની વિધિઓ શરૂ થઈ ગઈ છે. બે દિવસ સુધી ચાલનારા આ લગ્નમાં બંને 14 ફેબ્રુઆરી એટલે કે વેલેન્ટાઈન ડેના રોજ સાત ફેરા લેશે.

હાર્દિક પંડ્યા અને નતાશા સ્ટેનકોવિકે 31 મે 2020ના રોજ કોર્ટ મેરેજ કર્યા હતા. કોરોનાના સમયમાં બંનેએ ખૂબ જ ખાનગી રીતે લગ્ન કર્યા હતા અને આવી જ તસવીરો સોશિયલ મીડિયા પર શેર કરી હતી. કોરોના રોગચાળાને કારણે લાદવામાં આવેલા પ્રતિબંધોને કારણે લગ્નમાં કોઈ મહેમાન આવ્યા ન હતા. જો કે આ વખતે બંને પરંપરાગત રીત રિવાજ મુજબ લગ્ન કરશે. લગ્ન સમારોહ ઉદયપુરની રેફલ્સ હોટલમાં થઈ રહ્યો છે.

હાર્દિક પંડ્યા અને નતાશા સ્ટેનકોવિક સોમવારે લગ્નમાં હાજરી આપવા ઉદયપુર પહોંચ્યા હતા. તેની સાથે પરિવારના સભ્યો અને ભારતીય ક્રિકેટર ઈશાન કિશન પણ હતા. લગ્નની વિધિ સાંજે શરૂ થઈ હતી, જે 15 ફેબ્રુઆરી સુધી ચાલશે. સોમવારે મહેંદી સમારોહ યોજાયો હતો જ્યારે મંગળવારે હલ્દી અને સંગીત જેવા કાર્યક્રમો યોજાયા હતા. લગ્નના ફેરા અને અન્ય ધાર્મિક વિધિઓ પણ મંગળવારે જ થશે.