MI કેપ્ટન હાર્દિક પંડ્યાના સાવકા ભાઈની ધરપકડ, કરોડો રૂપિયાની કરી છેતરપિંડી...

મુંબઈ પોલીસે ભારતીય ક્રિકેટર હાર્દિક અને કૃણાલ પંડ્યાના સાવકા ભાઈ વૈભવ પંડ્યાની ધરપકડ કરી છે. વૈભવ પર આરોપ છે કે તેણે હાર્દિક-કૃણાલ સાથે બિઝનેસ પાર્ટનરશીપમાં લગભગ 4.3 કરોડ રૂપિયાની છેતરપિંડી કરી હતી.

ટાઈમ્સ ઓફ ઈન્ડિયાના અહેવાલ મુજબ, 37 વર્ષીય વૈભવ પર ભાગીદારી પેઢીમાંથી લગભગ 4.3 કરોડ રૂપિયાની ઉચાપત કરવાનો આરોપ છે. જેના કારણે હાર્દિક-કૃણાલને ઘણું આર્થિક નુકસાન થયું છે. કથિત ગેરરીતિમાં ભંડોળનો દુરુપયોગ અને ભાગીદારીની શરતોનું ઉલ્લંઘન સામેલ છે.

વૈભવે પંડ્યા ભાઈઓને છેતર્યા

રિપોર્ટ અનુસાર ત્રણ વર્ષ પહેલા ત્રણ વ્યક્તિઓએ સંયુક્ત રીતે ચોક્કસ શરતો સાથે પોલિમર બિઝનેસની સ્થાપના કરી હતી. ક્રિકેટર ભાઈઓએ 40 ટકા મૂડીનું રોકાણ કરવાનું હતું જ્યારે વૈભવે 20 ટકા યોગદાન આપવાનું હતું અને દૈનિક કામગીરીનું સંચાલન કરવાનું હતું. નફો આ શેર પ્રમાણે વહેંચવાનો હતો. જો કે, વૈભવે કથિત રીતે તેના સાવકા ભાઈઓને જાણ કર્યા વિના આ જ વ્યવસાયમાં બીજી પેઢી સ્થાપી અને ભાગીદારી કરારનો ભંગ કર્યો.