હબીબી... વેલકમ ટુ દુબઈ’ નહીં, પણ “સુરત” : અડધે આકાશે ધુમ્મસની ચાદર પથરાતા બુર્ઝ ખલીફા જેવો માહોલ સર્જાયો...

• વેસ્ટર્ન ડિસ્ટર્બન્સની અસર વાતાવરણમાં વર્તાય

• ઉત્તરના પવનો ફૂંકાતા વાતાવરણમાં આવ્યો પલટો

• રાત્રિનું તાપમાન 1.1 ડિગ્રી સેલ્સિયસ સુધી ઘટ્યું

• વાતાવરણમાં ધુમ્મસની ચાદર છવાઈ

• આગામી દિવસમાં માવઠાની પણ કરાઈ છે આગાહી

સુરત શહેરની બુધવારની વહેલી સવારનું વાતાવરણ ખુશનુમા બની ગયું હતું.સમગ્ર શહેરને ધુમ્મસે બાનમાં લેતા હિલસ્ટેશનનો અનુભવ શહેરીજનોએ કર્યો હતો,જોકે ઝીરો વિઝિબિલિટી સર્જાતા વાહનચાલકોને મુશ્કેલીનો સામનો કરવો પડ્યો હતો.

સુરતમાં ઉત્તરના ઠંડા પવનો ફૂંકાતા રાત્રીનું તાપમાન 1.1 ડિગ્રી સેલ્સિયસ ઘટી ગયું હતું. હવામાન વિભાગની આગાહી અનુસાર આગામી બે દિવસ રાત્રીનો પારો હજુ બે ડિગ્રી સુધી ઘટી શકે છે. ત્યારે આજે રીતસર સુરતમાં ધુમ્મસની ચાદર પથરાઈ ગઈ હતી. ધુમ્મસની ઉપર બિલ્ડીંગો દેખાઈ રહી હતી. જાણે કે ધુમ્મસ રસ્તા પર ઉતરી આવ્યો હોય તેવા દ્રશ્યો સર્જાયા હતા. અત્રે ઉલ્લેખનીય છે કે વેસ્ટર્ન ડિસ્ટર્બન્સને લીધે આગામી 2 ફેબ્રુઆરીના રોજ સૌરાષ્ટ્રની સાથે દક્ષિણ ગુજરાતમાં માવઠાની આગાહી વ્યક્ત કરાઈ છે.છૂટાછવાયા વિસ્તારોમાં હળવો વરસાદ પડી શકે છે.

સાયક્લોનિક સર્ક્યુલેશનની સાથે વેસ્ટર્ન ડિસ્ટર્બન્સને પગલે ફેબ્રુઆરીની 2 તારીખે વાતાવરણમાં પલટો જોવા મળી શકે છે. ખાસ કરીને દક્ષિણ ગુજરાતના નવસારી અને વલસાડ જિલ્લાના છૂટાછવાયા વિસ્તારોમાં હળવો કમોસમી વરસાદ પડી શકે છે. વરસાદની આગાહીને પગલે વાદળછાયું વાતાવરણ છવાયેલું જોવા મળી શકે છે. દરમિયાન સુરતનું મહત્તમ તાપમાન 33.1 ડિગ્રી અને લઘુત્તમ તાપમાન 16.8 ડિગ્રી સેલ્સિયસ નોંધાયું હતું.

સુરતના વાતાવરણમાં ભેજનું પ્રમાણ પણ વધ્યું છે.જ્યારે ઉત્તર દિશાના પ્રતિકલાક 6 કિલોમીટરની ઝડપના પવન ફૂંકાયો હતો. દક્ષિણ ગુજરાતમાં ડાંગનું મહત્તમ તાપમાન સૌથી ઉંચુ નોંધાયું હતું. નવસારી અને વલસાડમાં માવઠાની આગાહીને પગલે ખેડૂતો ચિંતિત થઈ ઉઠ્યા છે. આ ઉપરાંત ઉત્તરના ઠંડા પવનો ફૂંકાવાનું શરૂ થતાં આગામી દિવસમાં ઠંડીનું જોર વધશે. સુરતની વાત કરીએ તો રાત્રીનો પારો 2 ડિગ્રી સુધી ઘટવાની શક્યતા વ્યક્ત કરવામાં આવી છે.