દારૂબંધીની વાત કરતી ગુજરાત સરકાર સામે પડકાર
કાયદાનો ડર ન હોય તેમ કેટલાક લોકો બેફામ બન્યા
ઉધનામાં લગ્ન પ્રસંગે દારૂની બોટલ સાથે કર્યો ડાન્સ
વાઇરલ વિડિયોના આધારે પોલીસની કડક કાર્યવાહી
દારૂની બોટલ સાથે ડાન્સ કરતાં 8 ઈસમોની ધરપકડ
સુરત શહેરના ઉધના વિસ્તારમાં લગ્ન પ્રસંગે દારૂની બોટલ સાથે ડાન્સ 8 ઈસમોની પોલીસે ધરપકડ કરી કાયદેસરની કાર્યવાહી હાથ ધરી છે. ગુજરાતમાં દારૂબંધીની વાત કરતી સરકાર સામે જાણે પડકાર ફેંક્યો હોય તેવી સ્થિતિ સુરતમાં જોવા મળી છે. કાયદો-વ્યવસ્થાનો ડર ન હોય તે રીતે કેટલાક લોકો લગ્ન પ્રસંગે બેફામ બનીને મોજ-મસ્તી કરતા દેખાઈ રહ્યા છે.
જાહેર સ્થળ પર દારૂની બોટલ સાથે યુવાનનો ડાન્સ કરતો વિડિયો હાલ સોશિયલ મીડિયામાં ખૂબ વાઇરલ થઈ રહ્યો છે. મળતી માહિતી અનુસાર, દારૂની બોટલ સાથે ડાન્સ કરતો આ વિડિયો સુરત શહેરના ઉધના વિસ્તારનો હોવાનું સામે આવ્યું છે. સમગ્ર મામલે ઉધના પોલીસે વિડિયોના આધારે કડક કાર્યવાહી હાથ ધરી હતી.
જેમાં ગણતરીના કલાકોમાં જ વિડિયોમાં દેખાતા તમામ 8 ઈસમોને ઝડપી પાડ્યા હતા. પોલીસ તપાસ દરમ્યાન વાઇરલ વિડીયો ઉધના વિસ્તારની કર્મયોગી સોસાયટીનો હોવાનું બહાર આવ્યું છે. તો બીજી તરફ, ઉધના પોલીસે ગુનો નોંધી દારૂ ક્યાંથી લાવવામાં આવ્યો હતો, તે અંગે પણ તપાસ શરૂ કરી છે.