સુરત : 200 વર્ષ પહેલા સ્વામિનારાયણ ભગવાને પારસી પરિવારને આપી પાઘડી, ભાઇબીજે દર્શન માટે ઊમટ્યું ઘોડાપૂર

200 વર્ષ પહેલા ભગવાન સ્વામિનારાયણ દ્વારા સુરતના સૈયદપુરા વિસ્તારમાં રહેતા પારસી વાડિયા પરિવારને ભેટ આપવામાં આવી હતી, ત્યારે દર વર્ષે ભાઈબીજના દિવસે પાઘડીના દર્શન માટે ઘોડાપૂર ઊમટ્યું હતું.

ઇ.સ. 1881માં સુરત ખાતે પધારેલા સ્વામિનારાયણ ભગવાને તે વખતે પારસી કોટવાળ અરદેશરને પોતાની પાઘડી અને શ્રીફળ આપ્યા હતા. જે આજે 199 વર્ષે પણ પારસી પરિવાર પાસે છે, અને તેનું જીવની જેમ જતન કરે છે. ભગવાનનું માથું પોતાની પાસે હોવાનું માનતા આ પારસી પરિવાર પ્રેમથી પાઘના દર્શન સૌ કોઈને કરાવે છે. એક ધાર્મિક આસ્થા પ્રમાણે આ પાઘડી કોઈ સામાન્ય નહિ પણ સદીઓ પૂર્વે સ્વામીનારાયણ ભગવાને ધારણ કરી હતી તે છે.

200 વર્ષ પૂર્વે  સ્વામીનારાયણ ભગવાન સુરત આવ્યા હતા. સુરતમાં થોડા દિવસો રોકાયા બાદ અરદેશર કોટવાળની સેવાથી ખુશ થયેલા ભગવાને સંવંત 1881ના માગશર સુદ ત્રીજે પરત જતા અગાઉ કોટવાળને શ્રીફળ અને પોતાની પાઘ ભેટમાં આપી હતી, ત્યારથી આ પાઘડીને સુરતમાં આજદિન સુધી સેવા કરી સાચવામાં આવી છે. હયાત ત્રીજી પેઢી તહેમસ્પ અને તેમના દીકરા કેરશાસ્પ તેમના જીવની જેમ પાઘડીનું જતન કરી રહ્યા છે.

મૂળ આ પરિવાર પારસી કોમ્યુનીટીનું છે. છતાં તેઓ વર્ષોથી પોતાના ધર્મ સાથે સ્વામિનારાયણ ધર્મને અપનાવ્યો છે, ત્યારે સૈયદપુરા વિસ્તારમાં રહેતા વાડિયા પરિવારે પાઘ માટે અલાયદો રૂમ બનાવ્યો છે. જેમાં નુકશાન ન પહોંચે તે રીતે લાકડાની પેટીમાં પાઘને સાચવી રાખી છે, અને દર વર્ષે ભાઈબીજના દિવસે પાઘના દર્શન કરાવે છે. આ સાથે પોતે પણ રોજ સવારે પાઘની પૂજા કરે છે. પારસી પરિવારના સભ્યો શ્રીજી ભગવાનની પાઘને તેમનું માથું હોય તે રીતે જતન કરે છે. એટલું જ નહીં, શ્રીજીની કંઠી બાંધવાની સાથે પારસી ધર્મની જનોઈ પણ ધારણ કરે છે.