સુરત: ધોધમાર વરસાદના કારણે નીચાણવાળા અનેક વિસ્તારોમાં પાણી ભરાયા,જનજીવનને વ્યાપક અસર

સુરત શહેરમાં ધોધમાર વરસાદ થવાને કારણે નીચાણવાળા વિસ્તારમાં પાણી ભરાઈ ગયા હતા. એકાએક વરસાદ ત્રાટકવાના કારણે વાહનચાલકોને પણ ભારે મુશ્કેલીનો સામનો કરવો પડ્યો હતો.

આખરે વિધિવત રીતે ચોમાસુ શરૂ થઈ જતા વરસાદી માહોલ સુરત શહેરમાં અને દક્ષિણ ગુજરાતમાં બરાબરનો જામી ગયો છે. ગઈકાલ મોડીરાતથી જ મેઘરાજા મન મૂકીને વરસી રહ્યા છે. સવારથી શરૂ થયેલા વરસાદને કારણે જનજીવન ઉપર પણ તેની અસર દેખાઈ રહી છે. સેન્ટ્રલ ઝોનમાં મેટ્રોની કામગીરી શરૂ હોવાના કારણે મોટાભાગની જગ્યા ઉપર આડશ ઉભી કરી દેવામાં આવી છે. જેથી પાણીનો નિકાલ થઈ રહ્યો નથી. રસ્તાની બંને તરફ જે રીતે મેટ્રો ટ્રેન પ્રોજેક્ટને કારણે પતરા લગાવવામાં આવ્યા છે તેનાથી પાણીનો ઝડપથી નિકાલ થઈ રહ્યો નથી. ઠેર ઠેર પાણીનો ભરાવો થતા હોવાના દૃશ્યો સામે આવી રહ્યા છે. દર વર્ષે જે પ્રકારે પાણીનો નિકાલ સહજ રીતે ઝડપથી થઈ જતો હતો તેને બદલે મેટ્રો કામગીરીના કારણે અડચણ ઊભી થઈ હોય તે સ્પષ્ટ દેખાઇ રહ્યું છે.