• ઉતરાયણ પર્વને લઈને સુરત પોલીસનો એક્શન પ્લાન

• ચોરી અને છેડતી રોકવા પોલીસ દ્વારા રખાતી બાજ નજર

• ડ્રોન કેમેરા તેમજ દૂરબીનથી પોલીસ રાખી રહી છે નજર

• પોલીસે પીપૂડા વગાડી લોકોને સાવચેત રહેવા અપીલ કરી

• ચાઈનીઝ દોરી-તુક્કલના વેંચાણ સામે પોલીસની લાલ આંખ

 ઉત્તરાયણ પર્વને લઈને સુરતના 100 વર્ષ જૂના ડબગરવાડમાં ચોરી અને છેડતીની ઘટના ન બને તેમજ અસામાજિક તત્વો વેપારીઓ અને લોકોને હેરાન ન કરે તે માટે પોલીસે હાથમાં પીપૂડા લઈને ખાખીમાં નહીં, પણ સાદા ડ્રેસમાં ફરી લોકોને સાવચેત રહેવા અપીલ કરી હતી.

સામાન્ય રીતે ચોર કે, રોમિયોને પકડવા માટે પોલીસ હાથમાં ડંડો લઈને ફરતી હોય છે, પરંતુ સુરતમાં આ વખતે પોલીસ હાથમાં ડંડો નહીં, પરંતુ પિપૂડા લઈને ફરી રહી છે. ઉત્તરાયણ પર્વને હવે ગણતરીના દિવસો બાકી રહ્યા છે, ત્યારે સુરતિલાલાઓ પતંગ-દોરાની ખરીદીમાં લાગી ગયા છે. શહેરના પ્રખ્યાત પતંગ બજાર એવા ડબગરવાડમાં પતંગ-દોરાની ખરીદીમાં લોકોની ભીડ જામી છે.

ત્યારે આવી ભીડનો ફાયદો ઉઠાવી ખિસ્સાકાતરું મોબાઈલ અને પર્સની ચોરી કરતા હોય છે. તેવામાં આ વર્ષે એ પ્રકારની ઘટના ન બને તે માટે લાલગેટ પોલીસે પ્લાન ઘડી પતંગ બજારમાં લોખંડી બંદોબસ્ત ગોઠવી દેવામાં આવ્યો છે.

આ સાથે જ ડ્રોન કેમેરા તેમજ ઊંચી ઈમારતો પરથી પોલીસ દૂરબીનની મદદથી ચાંપતી નજર રાખી રહી છે. એટલું જ નહીં, ગ્રાહકના વેશમાં પોલીસકર્મીઓ સતત બજારમાં ફરતા રહેશે, અને કોઈ શંકાસ્પદ વ્યક્તિ જણાય તો તેની પૂછપરછ કરવામાં આવશે. ખાસ કરીને પોલીસની શી’ ટીમ એન્ટ્રી અને એક્ઝિટ પોઈન્ટ પર તૈનાત છે.