સુરત : મોબાઈલ સ્નેચિંગ કરતી ગેંગનો પુણા પોલીસે કર્યો પર્દાફાશ, 17 મોબાઈલ સાથે 4 શખ્સોની ધરપકડ

• પુણા પોલીસે મોબાઈલ સ્નેચિંગ કરતી ગેંગની ધરપકડ કરી

• આરોપીઓ પોલીસે પાસેથી 17 જેટલા મોબાઈલ જપ્ત કર્યા

• ગેંગનો મુખ્ય સભ્ય રત્ન કલાકાર હોવાનું પણ સામે આવ્યું

• સ્નેચિંગ બાદ ઈસમો મોબાઈલ લોક તોડાવી લોકોને વેંચતા

• ગેંગના 4 સાગરીતોની ધરપકડ કરી કાયદેસરની કાર્યવાહી

સુરત શહેરની પુણા પોલીસે મોબાઈલ સ્નેચિંગ કરતી ગેંગના 4 સાગરીતોની 17 જેટલા મોબાઈલ સાથે ધરપકડ કરી કાયદેસરની કાર્યવાહી હાથ ધરી છે.

સુરત શહેરની પુણા પોલીસે બાતમીના આધારે, મોબાઈલ સ્નેચિંગ કરતી ગેંગના 4 સાગરીતોની ધરપકડ કરી છે. આ ગેંગનો મુખ્ય સભ્ય રત્ન કલાકાર હોવાનું પોલીસ તપાસમાં સામે આવ્યું છે. પોલીસે આરોપી શુભકમણ વિશ્વકર્મા, રાજેશ ઉર્ફે રાહુલ મકવાણા, રાહુલ માલી અને પારસ ગુર્જર પાસેથી 17 જેટલા મોબાઈલ જપ્ત કર્યા છે. મોબાઈલ સ્નેચિંગ કર્યા બાદ આ ઈસમો મોબાઈલનો લોક તોડાવી લોકોને વેચી દેતા હતા.

આ ટોળકીએ શહેરના વરાછા, પુણા, કાપોદ્રા અને સારોલી વિસ્તારમાં મોબાઈલ સ્નેચિંગની ઘટનાને અંજામ આપ્યો હતો. જેમાં મુખ્ય આરોપી શુભકમણ વિશ્વકર્મા સામે સુરતના અલગ અલગ પોલીસ સ્ટેશનમાં 11 જેટલા ગુના નોંધાયેલા છે, જ્યારે રાજેશ મકવાણા સામે સુરતના અલગ અલગ પોલીસ સ્ટેશનમાં 5 ગુના નોંધાયા છે, ત્યારે હાલ તો પોલીસે મોબાઈલ સ્નેચિંગ કરતાં 4 સાગરીતોની ધરપકડ કરી કાયદેસરની કાર્યવાહી હાથ ધરી છે.