સુરત : અમદાવાદના શો-રૂમમાંથી રૂ. 1.19 કરોડના દાગીનાની ચોરી કરનાર પટ્ટાવાળાની સારોલી પોલીસે ધરપકડ કરી...

• સુરત શહેરની સારોલી પોલીસને મળી છે મોટી સફળતા

• અમદાવાદમાં રૂ. 1.19 કરોડના દાગીના ચોરીનો મામલો

• ચોરી કરનાર ઈસમ સુરત શહેરના સારોલીથી ઝડપાયો

• પોલીસે ચોરી થયેલા રૂ. 1 કરોડના દાગીના જપ્ત કર્યા

• જ્વેલર્સની દુકાનના પટ્ટાવાળાએ કરી હતી ચોરી : પોલીસ 

અમદાવાદ શહેરના ઝવેરીવાડ વિસ્તાર સ્થિત 'બેરા જ્વેલર્સ' શો-રૂમમાંથી રૂ. 1.19 કરોડના મુદ્દામાલની ચોરી થઈ હતી, ત્યારે આ મામલે સુરતની સારોલી પોલીસે શો-રૂમમાં કામ કરતાં પટ્ટાવાળાની ધરપકડ કરી મુદ્દામાલ જપ્ત કર્યો છે.

અમદાવાદ શહેરના ઝવેરીવાડમાં આવેલા 'બેરા જ્વેલર્સ' નામના શો-રૂમમાં થયેલી રૂ. 1.19 કરોડની ચોરીનો ભેદ ઉકેલાયો છે. જેમાં ચોરીને અંજામ આપનાર અન્ય કોઈ નહીં પરંતુ, છેલ્લા 15 દિવસથી કામ કરતો પટ્ટાવાળો શાહરુખદીન કમલુદ્દીન મીર જ હોવાનું સામે આવ્યું છે. અમદાવાદમાં ચોરી કરી ફરાર થનારને સુરત સારોલી પોલીસે બાતમીના આધારે ચોરીના મુદ્દામાલ સાથે સુરતમાંથી ઝડપી પાડ્યો છે.

આરોપીએ પોતાની પાસે રહેલી ચાવીઓનો ઉપયોગ કરીને મુખ્ય તિજોરીનું લોક ખોલ્યું અને કિંમતી સોના અને ડાયમંડના દાગીના બેગમાં ભરીને નાસી છૂટ્યો હતો. પોલીસે આરોપી પાસેથી 1417.77 ગ્રામ સોનાના દાગીના, 697.82 ગ્રામ ચાંદીના દાગીના અને 2 મોબાઇલ ફોન મળી રૂ. 1,19,85,195ની કિંમતનો મુદ્દામાલ જપ્ત કર્યો છે.

પોલીસ તપાસમાં સામે આવ્યું છે કે, આરોપી શાહરુખદીન મીર અગાઉ રાજકોટની એક જ્વેલરી શોપમાં પણ નોકરી કરતો હતો. આ માહિતી પરથી પોલીસને શંકા છે કે, તે આ પ્રકારના ગુનાઓને અંજામ આપવામાં સક્રિય હોવાનું પોલીસ તપાસમાં સામે આવ્યું છે.