સુરત : કતારગામ-ગોતાલાવાડીમાં HVK ડાયમંડના રત્ન કલાકારોની હડતાળ બીજા દિવસે પણ યથાવત...

• ડાયમંડ ઉદ્યોગમાં 50 વર્ષના ઈતિહાસમાં સૌથી લાંબી મંદી

• કતારગામના ગોતાલાવાડીમાં રત્ન કલાકારોની હડતાળ

• HVK ડાયમંડના રત્ન કલાકારોની બીજા દિવસે પણ હડતાળ

• ભાવ વધારાની માંગ સાથે હડતાળને યથાવત રખાય

• ભાવ વધારો નહીં થાય ત્યાં સુધી હડતાળ યથાવત રહેશે

સુરત શહેરના કતારગામ વિસ્તારમાં આવેલ ગોતાલાવાડી સ્થિત HVK ડાયમંડના રત્ન કલાકારો ભાવ વધારાની માંગ સાથે છેલ્લા 2 દિવસથી હડતાળની રાહે આવ્યા છે.

સુરતના ડાયમંડ ઉદ્યોગમાં છેલ્લાં અઢી વર્ષના વધુ સમયથી મંદી ચાલી રહી છે. ડાયમંડ ઉદ્યોગના 50 વર્ષના ઈતિહાસમાં આ સૌથી લાંબી મંદી છે. તો બીજી તરફ, મંદી અને મોંઘવારીએ કેટલાક રત્ન કલાકારોના જીવ પણ લીધા છે. તેવામાં કતારગામ વિસ્તારમાં આવેલ ગોતાલાવાડી સ્થિત HVK ડાયમંડના રત્ન કલાકારો છેલ્લા 2 દિવસથી હડતાળની રાહે આવ્યા છે.

રત્ન કલાકારો ભાવ વધારો કરવાની માંગ સાથે કામથી અળગા રહી હડતાળ પર ઉતર્યા છે. આ મામલે આજે બીજા દિવસે પણ રત્ન કલાકારોએ ભેગા થઈ ઉગ્ર વિરોધ નોંધાવ્યો હતો. રત્ન કલાકારોએ ભાવ વધારાની માંગ કરતા માલિકે ભાવ વધારો કરવાની બાંહેધરી આપી હતી. પરંતુ ભાવમાં વધારો ન કરતા રત્ન કલાકારો હડતાળ ઉપર યથાવત રહ્યા છે.

રત્ન કલાકારોને અત્યારે એક ડાયમંડ તળિયાનો 16 રૂપિયા 50 પૈસા ભાવ આપવામાં આવે છે. રત્ન કલાકારોની માંગણી છે કે, તેમાં 1.50 રૂપિયાનો વધારો કરવામાં આવે, જ્યાં સુધી ભાવ વધારો નહીં થાય ત્યાં સુધી રત્ન કલાકારોની હડતાળ યથાવત રહેશે તેવું ડાયમંડ વર્કર યુનિયન દ્વારા જણાવાયું હતું.