સુરત : ટેક્સટાઈલ ઉદ્યોગોએ બજેટને આવકાર્યું,તો ડાયમંડ વર્કસ યુનિયનમાં અંદાજપત્ર થી અસંતોષ

• રાજ્યના નાણામંત્રીએ રજુ કર્યું બજેટ

• બજેટમાં ટેક્સટાઇલ ઉદ્યોગ માટે મહત્વપૂર્ણ જાહેરાત

• રૂ.2000 કરોડની કરવામાં આવી જોગવાઈ

• ડાયમંડ ઉદ્યોગમાં બજેટને લઈને સાંપડી નારાજગી

• ડાયમંડ વર્કસ યુનિયનમાં છવાયો અસંતોષ 

ગુજરાત રાજ્ય સરકારના નાણામંત્રી દ્વારા ટેકસટાઇલ પોલિસી માટે રૂ.2 હજાર કરોડની જોગવાઈ કરવામાં આવી છે.જેને સુરતના ટેક્સટાઈલ ઉદ્યોગકારોએ આવકાર્યું હતું.જોકે,હીરા ઉદ્યોગ માટે કોઈ રાહત પેકેજની જાહેરાત કરવામાં ન આવતા ડાયમંડ વર્કર યુનિયનમાં અસંતોષ જોવા મળ્યો હતો.

ગુજરાત રાજ્ય સરકારના નાણામંત્રી કનુ દેસાઈએ આજે રાજ્યનું બજેટ રજૂ કર્યું હતું,જેમાં તેઓએ વિવિધ મહત્વલક્ષી બાબતોને આવરી લીધી હતી,અને ખાસ કરીને ટેક્સટાઈલ  ઉદ્યોગ માટે પણ આ બજેટમાં રૂપિયા 2 હજાર કરોડની જોગવાઈ કરવામાં આવી છે,ત્યારે ગુજરાતના  ટેક્સટાઈલ હબ ગણાતા સુરત ટેક્સટાઈલ ઉદ્યોગ આલમે ખુશી વ્યક્ત કરીને બજેટને આવકાર્યું હતું,અને બજેટને ટેક્સટાઈલ ઉદ્યોગમાં નવું જોમ અને જુસ્સો લાવનાર તેમજ વિકાસલક્ષી ગણાવ્યું હતું.  

તો બીજી તરફ સુરતના ડાયમંડ બજારમાં બજેટને લઈને અસંતોષ જોવા મળ્યો હતો.મંદીમાં સપડાયેલા હીરા ઉદ્યોગ માટે રાજ્ય સરકાર દ્વારા બજેટમાં કોઈજ જાહેરાત કરવામાં ન આવતા ડાયમંડ ઉદ્યોગમાં નારાજગી જોવા મળી છે.ડાયમંડ વર્કર યુનિયનને આ બજેટથી અસંતોષ વ્યક્ત કર્યો હતો.છેલ્લા ઘણા સમયથી મંદીમાં સપડાયેલા હીરા ઉદ્યોગને લઈ અનેક રજૂઆત કરવામાં આવી હતી,પરંતુ તેમછતાં રત્નકલાકારોની કોઈ જ દરકાર લેવામાં આવી ન હોવાનું ડાયમંડ વર્કર યુનિયને જણાવ્યું હતું.