સુરત : અસલી પોલીસે કરી નકલી પોલીસની ધરપકડ, પોલીસમાં ફરજ નિભાવતો હોવાની જમાવતો હતો રોફ

સુરતમાં અસલી પોલીસે નકલી પોલીસની ધરપકડ કરી છે. ખાખી પહેરવાનો શોખ હોવાથી યુવક પીએસઆઇની વર્ધી પહેરીને લોકોમાં રોફ જમાવતો ફરતો હતો. પોલીસને શંકા જતા પૂછપરછ કરતા નકલી પીએસઆઇ હોવાનો ખુલાસો થયો હતો.

સરકારી નોકરી મેળવવા માટે શિક્ષિત યુવાનો રાત દિવસ મહેનત કરતા હોય છે. વર્ગ-2 પરીક્ષા માટે જીપીએસસીની પરીક્ષા આપવી પડતી હોય છે, ત્યારે ધોરણ 8 પાસ યુવક પોલીસ બનવાનો શોખ હોવાથી નકલી પીએસઆઇ બની બેઠો હતો. ખાખી વર્દી ખરીદી પીએસઆઇ બની લોકોમાં રોફ જમાવતો ફરતો હતો. સલાબતપુરા પોલીસ પેટ્રોલિંગમાં હતી. તે દરમિયાન સુરત જિલ્લાના ચોર્યાસી તાલુકાના પોપડાગામ આહીરવાસમાં રહેતો 24 વર્ષીય નીરલ અશ્વિન રાઠોડ ધોરણ 8 પાસ છે. નિરલને પોલીસ બનવાનો શોખ હોવાથી દુકાનમાંથી ખાખી યુનિફોર્મ ખરીદી પીએસઆઇ બનીને લોકોમાં ઉધના પોલીસ મથકમાં ફરજ નિભાવતો હોવાનું કહી રોફ જમાવતો હતો. જોકે, પોલીસની શંકા જતા પૂછપરછ કરી હતી, ત્યારે નિરલ રાઠોડ નકલી પીએસઆઇ હોવાનો ખુલાસો થયો હતો. સમગ્ર મામલે સલાબતપુરા પોલીસે નકલી પીએસઆઇ નીરલ રાઠોડની ધરપકડ કરી, જેલના સળિયા પાછળ ધકેલી આગળની કાર્યવાહી હાથ ધરી છે.