સવાર-સાંજ નાસ્તામાં કંઈક ટેસ્ટી અને ચટપટું ખાવાનું દરેક વ્યક્તિને પસંદ હોય છે. ત્યારે મોટાભાગના લોકો બજારમાંથી નાસ્તો ખરીદીને લાવતા હોય છે. ઉપરથી વરસાદી માહોલમાં સેન્ડવીચ, દાબેલી, વડાપાવ ખાવાનું મન વધારે થાય છે. ત્યારે આજે બ્રેડ વગરની સેન્ડવીચ ઘર બનાવવાની રેસિપી જણાવીશું.
સવારે- સાંજે ઓછા સમયમાં બ્રેડ વગરની સેન્ડવીચ બનાવીને તમે ખાઈ શકો છો. જેને બનાવવી ખૂબ જ સરળ છે. બ્રેડ લેસ સેન્ડવીચ સ્વાદિષ્ટની સાથે સ્વાસ્થ્ય માટે ખૂબ લાભકાર છે.
બ્રેડ વગરની સેન્ડવીચ બનાવવા માટે રવો, દહીં અથવા છાશ, ઈનો, ગાજર, કાકડી, મીઠું, લીલા મરચા, પનીર, ચીઝ, બીટ, ડુંગળી, તેલ અને પાણી સહિતની વસ્તુઓની જરુર પડશે.
બ્રેડ વગરની સેન્ડવીચ બનાવવા માટે સૌથી પહેલા રવાને એક વાસણમાં લો. તેમાં જરુર અનુસાર દહીં ઉમેરી બરાબર મિક્સ કરી 10 મિનિટ રેસ્ટ કરવા માટે મુકો.
હવે ગાજર, બીટ, કાકડી, ડુંગળીને છીણી લો. ત્યારબાદ રવાના બેટરમાં એડ કરી બરાબર મિક્સ કરો. હવે તેમાં લીલા મરચાં-આદુંની પેસ્ટ અને સ્વાદ અનુસાર મીઠું ઉમેરી મિક્સ કરી લો.
ત્યારબાદ રવાના બેટરમાં ઈનો ઉમેરો. સેન્ડવીચ મેકરમાં તેલ લગાડી બેટર મુકો ત્યારબાદ તેની ઉપર પનીર અને ચીઝ મુકી તેને ફરી એક વાર બેટરથી કવર કરી લો.
હવે સેન્ડવીચ બંન્ને બાજુથી ગોલ્ડન થાય ત્યાં સુધી થવા દો. તમે આ સેન્ડવીચ લીલી ચટણી સાથે સર્વ કરી શકો છો.
