વડોદરા શહેરના ગોત્રી વિસ્તારમાં CNG સપ્લાય કરતા વાહનમાં ગેસ લીકેજથી નાસભાગ મચી

વડોદરા શહેરના ગોત્રી વિસ્તારમાં આજે સવારના સમયે CNG સપ્લાય કરતી ગાડીમાં પાઇપલાઇન ફાટી જતા લીકેજ થયું હતું. જેને પગલે આસપાસના વિસ્તારમાં અફરાતફરી નો માહોલ સર્જાય ગયો હતો.ઘટનાની જાણ થતા બ્રિગેડની ટીમ સ્થળ પર દોડી ગઈ હતી અને વાલ્વ બંધ કરીને ગેસ લીકેજ થતું અટકાવ્યું હતું.

વડોદરા શહેરના ગોત્રી વિસ્તાર માંથી આજે સવારે 7:30 વાગ્યે CNG સ્ટેશન ઉપર સપ્લાય કરતી CNG ભરેલી ગાડી પસાર થઈ રહી હતી. આ સમયે CNG ગાડીનો પાઇપ ફાટ્યો હતો. જેના કારણે તેમાંથી CNG લીકેજ થવા લાગ્યો હતો.જેની જાણ થતાં ડ્રાઇવરે તુરંત જ ગાડી રોકી દીધી હતી અને CNG લીકેજ અટકાવવા માટે પ્રયાસો શરૂ કર્યા હતા. મુખ્ય રોડ પર ગેસ લીકેજ થતા એક તરફનો રસ્તો બંધ કરવાની ફરજ પડી હતી.

બીજી તરફ આ ઘટનાની જાણ વડીવાડી ફાયર બ્રિગેડને કરવામાં આવી હતી, જેથી વડીવાડી ફાયર બ્રિગેડની ટીમ સ્થળ પર દોડી ગઈ હતી અને અડધો કલાકની જહેમત બાદ ગેસ લીકેજ થતાં અટકાવ્યો હતો.જેને કારણે આસપાસના લોકોએ રાહતનો શ્વાસ લીધો હતો.