વડોદરા : ડૂબતા સૂરજ સાથે કેનાલની સેલ્ફી લેવા જતાં 2 વિદ્યાર્થી ડૂબ્યા, એકનો આબાદ બચાવ, અન્યની શોધખોળ…

વડોદરા શહેરના છાણી ટીપી-13માં રેલ્વે ગરનાળા નજીક નર્મદા કેનાલ પર ગત રવિવારે સાંજે સાઇકલિંગ કરવા નીકળેલા ધો.11 અને 12ના 2 વિદ્યાર્થી સેલ્ફી લેવા જતાં કેનાલમાં પડ્યા હતા. જેમાં એક વિદ્યાર્થીને સ્થાનિકોએ બચાવી લીધો હતો, જ્યારે બીજાની શોધખોળ હજુ જારી છે.

મળતી માહિતી અનુસાર, વડોદરા શહેરના નિઝામપુરા વિસ્તારમાં આવેલ ગાયત્રી એપાર્ટમેન્ટમાં રહેતો અને ડીઆર પટેલ સ્કૂલમાં ધો-12માં અભ્યાસ કરતો દેવ મોરે તેના વિસ્તારમાં સર્વોદય સોસાયટીમાં રહેતા અને ધો-11માં અભ્યાસ કરતાં તેના મિત્ર પ્રભદેવસિંગ સાથે ગત રવિવારે સાંજે 6 વાગે ઘરેથી નીકળી છાણી કેનાલ પાસે સાઇકલિંગ કરવા ગયા હતા. આ દરમિયાન તેઓ સાંજે ડૂબતા સૂરજ સાથે કેનાલની સેલ્ફી લેવા સાઇકલ સાથે કેનાલની પાળી પર ચઢીને ઉભા રહ્યા હતા. આ દરમિયાન ત્યાંથી એક પૂર ઝડપે કાર પસાર થઈ હતી. જેથી બન્ને અચાનક ડરી જતાં કેનાલમાં 10 ફૂટ ઊંડા પાણીમાં ખાબક્યા હતા. આ દરમ્યાન બન્ને વિદ્યાર્થીઓને ડૂબતા જોઈ નજીકમાં રહેતા શ્રમજીવીઓ દોડી આવ્યા હતા. જેમાં શ્રમજીવિઓએ બન્ને વિદ્યાર્થીઓને બચાવવા માટે પાણીમાં સાડી ફેંકી હતી. પરંતુ, સાડી ટૂંકી પડતા એક શ્રમજીવી કેનાલમાં કૂદ્યો હતો, અને પ્રભદેવસિંગને બચાવી લીધો હતો, જ્યારે દેવ મોરેનો પત્તો લાગ્યો ન હતો. બનાવની જાણ થતાં જ ફાયરબ્રિગેડના જવાનો ઘટના સ્થળે દોડી આવ્યા હતા. રાત્રે અંધારું થઈ જતાં લાશ્કરોએ ફ્લડ લાઇટ લગાવી વિદ્યાર્થીની શોધખોળ કરી હતી. જોકે, તેનો પત્તો લાગ્યો નહોતો, પરંતુ પાણીમાંથી વિદ્યાર્થીઓની સાઇકલ મળી આવી હતી.