વડોદરામાં વિદેશી વિદ્યાર્થીની દાદાગીરી

કન્સ્ટ્રક્શન સાઈટના મેનેજર પર કર્યો હુમલો

ઝિમ્બાબ્વેનો યુવક ખાનગી યુનિવર્સિટીમાં કરે છે અભ્યાસ  

યુવકે ડિપોઝીટના રૂપિયા મુદ્દે કર્યો હુમલો 

તોફાની વિદ્યાર્થીએ પોલીસને પણ મારી થપ્પડ

વડોદરાની જાણીતી પારૂલ યુનિવર્સિટીમાં અભ્યાસ કરતા ઝિમ્બાબ્વેના એક વિદ્યાર્થીએ ડિપોઝીટના રૂપિયા બાબતે એક વૃદ્ધને માર માર્યો હતો,તેમજ રૂપિયા 14 હજાર રૂપિયા પણ ટ્રાન્સફર કરી લીધા હતા,જ્યારે ઘટનામાં પોલીસ મધ્યસ્થી બનતા તોફાની વિદ્યાર્થીએ પોલીસ પર પણ હુમલો કર્યો હતો. 

વડોદરાના આજવા રોડ ખાતેની ડવ ડેક સોસાયટીની ઓફિસમાં મૂળ હાલોલના અને ખાનગી કન્સ્ટ્રક્શન સાઈટના મેનેજર 58 વર્ષીય રમેશ અગ્રવાલ બેઠા હતા,તે સમયે પારૂલ યુનિવર્સિટીમાં અભ્યાસ કરતા ઝિમ્બાબ્વેના વિદ્યાર્થીએ ડિપોઝીટના રૂપિયા બાબતે તેમના પર હુમલો કર્યો હતો.અને વિદ્યાર્થીએ આ સિનિયર સિટીઝનને ઢસડી-ઢસડીને માર માર્યો હતો. વૃદ્ધને માર મારતા તેઓ લોહીલુહાણ થઈ ગયા હતા અને તેમની આંખના ભાગે પણ ગંભીર ઇજા થઈ હતી.આ ઉપરાંત શરીરના ભાગે પણ ઈજાઓ પહોંચી છે. ત્યારબાદ તેમનો મોબાઈલ ઝૂંટવીને 14,000 રૂપિયા જબરદસ્તી તેના ખાતામાં ટ્રાન્સફર કરી લીધા હતા.અને ઘટના અંગે કપુરાઇ પોલીસને જાણ કરવામાં આવતા પોલીસ કાફલો પણ દોડી આવ્યો હતો.

જોકે આ તોફાની વિદેશી વિદ્યાર્થીએ પોલીસ પર પણ હુમલો કર્યો હતો.પોલીસકર્મી પૃથ્વીસિંહને થપ્પડો અને લાતો મારી હતી, જેથી તેઓ નીચે પડી ગયા હતા અને ઇજાગ્રસ્ત થયા હતા. આ ઉપરાંત બીજા પોલીસકર્મી રમેશ જેમલભાઈને પણ થપ્પડ મારી દીધી હતી.પારૂલ યુનિવર્સિટીમાં અભ્યાસ કરતો ઝિમ્બાબ્વેનો વિદ્યાર્થી વોશિંગ્ટન ટકુરા હોવાનું જાણવા મળ્યું છે.પોલીસે આ વિદેશી વિદ્યાર્થી સામે ફરિયાદ નોંધીને વધુ તપાસ શરૂ કરી છે.