સયાજીગંજ વિસ્તારના શ્રી રામ મંદિરે આયોજન

દુર્ગા શસ્ત્ર અર્પણ કાર્યક્રમનું ભવ્ય આયોજન કરાયું

બહેન ભાઈને, દીકરીએ પિતાને દુર્ગા શસ્ત્ર અર્પણ કર્યું

ગૌ, ગંગા, ગાયત્રી શીર્ષક હેઠળ દુર્ગા શસ્ત્ર અર્પણ

કાર્યક્રમમાં મોટી સંખ્યામાં નગરજનો ઉપસ્થિત રહ્યા

શક્તિ નમઃ સંસ્થા દ્વારા ગૌ, ગંગા, ગાયત્રી શીર્ષક હેઠળ દશેરાના પાવન અવસરે વડોદરાના યુવા સાંસદ ડો. હેમાંગ જોષીની ઉપસ્થિતિમાં બહેન ભાઈને અને દીકરીએ પિતાને દુર્ગા શસ્ત્ર અર્પણ કાર્યક્રમ યોજાયો હતો.

રાજ્યમાં માતા, બહેનો, મહિલાઓ સાથે બનતા અનિચ્છનીય બનાવને ધ્યાને લઈને શક્તિ નમઃ સંસ્થા દ્વારા વડોદરાના સયાજીગંજ વિસ્તારમાં આવેલ શ્રી રામ મંદિર ખાતે બહેન ભાઈને અને દીકરી પિતાને દુર્ગા શસ્ત્ર અર્પણ કરવાનો કાર્યક્રમ યોજવામાં આવ્યો હતો. માતા, બહેનો, મહિલાઓ સાથે દુષ્કર્મ જેવા ગંભીર બનાવોને અટકાવવા તેમજ મહિલાઓને સશક્ત બનાવવા હેતુસર આ કાર્યક્રમનું આયોજન કરવામાં આવ્યું હતું.

આ કાર્યક્રમમાં મોટી સંખ્યામાં મહિલા બહેનો વિશેષ ઉપસ્થિત રહી હતી. પોતાની સ્વરક્ષા માટે તલવાર સ્વરૂપે દુર્ગા શસ્ત્ર અર્પણ કરવામાં આવ્યા હતા. માતા બહેનોની સુરક્ષા માટે સરકાર કટિબદ્ધ છે, જ્યારે પોલીસ પ્રશાસન દ્વારા પણ ઉત્તમ સુરક્ષા પૂરી પાડવામાં આવે છે.

પણ મહિલા બહેનો સાથે કોઈ અનિચ્છનીય બનાવો બને ત્યારે સેલ્ફ ડિફેન્સના ભાગરૂપે તેઓને શસ્ત્ર તાલીમ પણ અગત્યની સાબિત થશે. તેવામાં મહિલાઓને સશક્ત બનાવવાના હેતુ સાથે દુર્ગા શસ્ત્રનું પૂજન અર્ચન કર્યા બાદ બહેન ભાઈને અને દીકરીએ પિતાને દુર્ગા શસ્ત્ર અર્પણ કર્યા હતા.

આ પ્રસંગે કાર્યક્રમના મુખ્ય આયોજક શોભના રાવલ, સાંસદ ડો. હેમાંગ જોષી, ગાર્ગી પંડિત, ભારતીય જનતા પાર્ટી વડોદરા શહેર અધ્યક્ષ ડો. વિજય શાહ, નગર પ્રાથમિક શિક્ષણ સમિતિના અધ્યક્ષ નિશદ દેસાઈ વિશેષ ઉપસ્થિત રહ્યા હતા.