પાકિસ્તાની પોલીસ અધિકારીના ખાતામાં અજાણ્યા વ્યક્તિએ મોકલ્યા 10 કરોડ, ખાતું સીલ.!

પાકિસ્તાનના કરાચીમાં એક પોલીસ અધિકારી રાતોરાત કરોડપતિ બની ગયો. એક 'અજાણ્યા' વ્યક્તિએ તેના બેંક ખાતામાં 10 કરોડ રૂપિયા જમા કરાવ્યા. આ અધિકારીના ખાતામાં પગારની રકમ સાથે વધારાના 10 કરોડ રૂપિયા જમા થયા છે.

આ રકમ કરાચીના પોલીસ સ્ટેશનના તપાસ અધિકારી અમીર ગોપાંગના ખાતામાં જમા કરવામાં આવી છે. તે પોતાના ખાતામાં અચાનક 10 કરોડ જમા જોઈને આશ્ચર્યચકિત થઈ ગયો. ગોપાંગે કહ્યું કે મારા ખાતામાં થોડા હજાર રૂપિયાથી વધુ ક્યારેય આવ્યા નથી. તેને આ વાતની જાણ ત્યારે થઈ જ્યારે તેને બેંકમાંથી ફોન આવ્યો અને કહેવામાં આવ્યું કે તેના ખાતામાં 10 કરોડ રૂપિયા જમા થઈ ગયા છે.

જો કે, ગોપાંગ ખાતા સાથે ટ્રાન્ઝેક્શન કરે તે પહેલાં, બેંકે ખાતાને સીલ કરી દીધું અને ઉપાડ અટકાવવા માટે તેનું એટીએમ કાર્ડ બ્લોક કરી દીધું. હવે બેંકની સાથે કરાચી પોલીસ પણ ખાતામાં આટલી મોટી રકમ આવવાની તપાસ કરી રહી છે. આ રકમ કેવી રીતે અને ક્યાંથી આવી તેની તપાસ કરવામાં આવી રહી છે.