ટ્રમ્પને ચીનનો જવાબ, અમેરિકન માલ પર ટેરિફ વધારીને ૧૨૫% કર્યો

ચીની માલ પર ૧૪૫% ટેરિફ લાદવા બદલ ચીને હવે અમેરિકા પર વળતો પ્રહાર કર્યો છે. ચીને શુક્રવારે અમેરિકાથી આયાત થતી વસ્તુઓ પર વધારાના ટેરિફ ૧૨૫ ટકા સુધી વધારી દીધા છે.

ચીનના વાણિજ્ય મંત્રાલયે જણાવ્યું હતું કે ચીને આયાતી અમેરિકન ઉત્પાદનો પર વધારાની ડ્યુટી વધારીને ૧૨૫ ટકા કરી દીધી છે. ચીને અગાઉ અમેરિકન ઉત્પાદનો પર ૮૪ ટકા ટેરિફ લાદવાની જાહેરાત કરી હતી.

વાણિજ્ય મંત્રાલયે કહ્યું કે અમેરિકા દ્વારા ટેરિફ વધાર્યા બાદ ચીને પણ વિશ્વ વેપાર સંગઠનમાં કેસ દાખલ કર્યો છે. બીજી તરફ, અમેરિકાના નવા નોટિફિકેશન મુજબ, ચીન પર કુલ વેપાર ડ્યુટી ૧૪૫ ટકા છે.

અગાઉ, ચીને 84 ટકા ડ્યુટી લાદીને અને કેટલીક યુએસ ફિલ્મોની આયાત પર પ્રતિબંધ મૂકીને બદલો લીધો હતો અને આ મુદ્દાને ઉકેલવા માટે વોશિંગ્ટન સાથે વાતચીત કરવામાં રસ દર્શાવ્યો હતો. ટ્રમ્પના ટેરિફનો બદલો લેનાર એકમાત્ર દેશ ચીન છે.

ચીનના રાષ્ટ્રપતિ શી જિનપિંગે શું કહ્યું?

ચીનના રાષ્ટ્રપતિ શી જિનપિંગે શુક્રવારે યુરોપિયન યુનિયનને અમેરિકાની "ધાકધમકીઓ"નો પ્રતિકાર કરવામાં બેઇજિંગમાં જોડાવા હાકલ કરી હતી અને કહ્યું હતું કે "ટેરિફ યુદ્ધમાં કોઈ વિજેતા નથી".

"ચીન અને યુરોપિયન યુનિયન આર્થિક વૈશ્વિકરણ અને મુક્ત વેપારના મજબૂત સમર્થક છે," શીએ સ્પેનિશ વડા પ્રધાન પેડ્રો સાંચેઝ સાથેની મુલાકાત દરમિયાન કહ્યું.

"ટેરિફ યુદ્ધમાં કોઈ વિજેતા નથી," શીએ કહ્યું. તેમણે ચીન અને EU ને "એકપક્ષીય ગુંડાગીરી" નો સંયુક્ત રીતે વિરોધ કરવા હાકલ કરી. શી અમેરિકાના વ્યાપક વૈશ્વિક ટેરિફનો ઉલ્લેખ કરી રહ્યા હતા.