ઈરાન સાથેના યુદ્ધ વચ્ચે ઈઝરાયલે ગાઝામાં વિનાશ મચાવ્યો, પ્રત્યક્ષદર્શીઓએ પરિસ્થિતિ વર્ણવી

એક તરફ જ્યારે ઈઝરાયલ અને ઈરાન વચ્ચે યુદ્ધ ચાલુ છે,ત્યારે બીજી તરફ ઈઝરાયલી સેનાએ ગાઝામાં વિનાશ મચાવ્યો છે. મંગળવારે વહેલી સવારે મધ્ય ગાઝામાં સહાય ટ્રકની રાહ જોઈ રહેલા સેંકડો લોકો પર ઈઝરાયલી સેનાએ ગોળીબાર કર્યો.

ઈઝરાયલ દ્વારા કરવામાં આવેલા ગોળીબારમાં ઓછામાં ઓછા25લોકો માર્યા ગયા છે. પેલેસ્ટિનિયન પ્રત્યક્ષદર્શીઓ અને હોસ્પિટલો દ્વારા આ અંગે માહિતી આપવામાં આવી છે. ઈઝરાયલી સેનાએ હજુ સુધી આ અંગે કોઈ ટિપ્પણી કરી નથી.

નુસેરાત શરણાર્થી શિબિરમાં સ્થિત અવદા હોસ્પિટલે જણાવ્યું હતું કે ગાઝાના દક્ષિણમાં સલાહ અલ-દીન રોડ પર પેલેસ્ટિનિયનો ટ્રકની રાહ જોઈ રહ્યા હતા. હુમલામાં ઘાયલ થયેલા લોકોને આ હોસ્પિટલમાં લાવવામાં આવ્યા છે. પ્રત્યક્ષદર્શીઓએ જણાવ્યું હતું કે જ્યારે લોકો ટ્રક તરફ આગળ વધી રહ્યા હતા ત્યારે ઈઝરાયલી સેનાએ ગોળીબાર કર્યો હતો.

એક પ્રત્યક્ષદર્શી અહેમદ હલાવાએ કહ્યું, 'તે એક હત્યાકાંડ હતો.'તેમણે કહ્યું કે ટેન્ક અને ડ્રોનથી લોકો પર ગોળીબાર કરવામાં આવ્યો હતો. તેમણે કહ્યું કે ઘણા લોકો માર્યા ગયા અથવા ઘાયલ થયા. અન્ય એક પ્રત્યક્ષદર્શી હુસમ અબુ શહાદાએ કહ્યું કે વિસ્તારમાં ડ્રોન ઉડતા હતા. પહેલા તેઓએ ભીડ પર નજર રાખી,પછી જ્યારે લોકો આગળ વધ્યા ત્યારે ટેન્ક અને ડ્રોનથી ગોળીબાર કર્યો.

https://x.com/AP/status/1937405097010426081

અવદા હોસ્પિટલે જણાવ્યું હતું કે146પેલેસ્ટિનિયન ઘાયલ થયા હતા. તેમાંથી62લોકોની હાલત ગંભીર છે,જેમને મધ્ય ગાઝાની બીજી હોસ્પિટલમાં લઈ જવામાં આવ્યા છે. મધ્ય શહેર દેઇર અલ-બલાહની એક હોસ્પિટલે જણાવ્યું હતું કે તેમને આ ઘટનામાં માર્યા ગયેલા છ લોકોના મૃતદેહ મળ્યા છે. ગાઝામાં ઇઝરાયલ-હમાસ યુદ્ધમાં ગોળીબારની આ નવીનતમ ઘટના છે.

ગાઝા પટ્ટીના આરોગ્ય મંત્રાલયના જણાવ્યા અનુસાર,યુદ્ધમાં અત્યાર સુધીમાં લગભગ56,000પેલેસ્ટિનિયનો મૃત્યુ પામ્યા છે અને ઘાયલોની સંખ્યા એક લાખને વટાવી ગઈ છે.7-ઓક્ટોબર, 2023ના રોજ હમાસે દક્ષિણ ઇઝરાયલ પર હુમલો કર્યા પછી ઇઝરાયલે ગાઝામાં પોતાનું ઓપરેશન શરૂ કર્યું હતું. હમાસના હુમલામાં લગભગ1200લોકો માર્યા ગયા હતા અને251અન્ય લોકોને બંધક બનાવવામાં આવ્યા હતા. મોટાભાગના બંધકોને યુદ્ધવિરામ કરાર દ્વારા મુક્ત કરવામાં આવ્યા છે.