ટ્રમ્પે ફરી ઈરાનને ચેતવણી આપી, કહ્યું 'જો અમેરિકા પર હુમલો થશે, તો અમે અકલ્પ્ય જવાબ આપીશું'

ઈઝરાયલ અને ઈરાન વચ્ચે ચાલી રહેલા યુદ્ધ વચ્ચે, અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ઈરાનને કડક ચેતવણી આપી છે. ટ્રમ્પે સ્પષ્ટપણે કહ્યું કે ઇઝરાયેલ દ્વારા ઈરાન પર કરવામાં આવેલા હુમલામાં અમેરિકાની કોઈ ભૂમિકા નથી. જો ઈરાન અમેરિકા પર કોઈપણ રીતે હુમલો કરશે, તો અમેરિકા સંપૂર્ણ તાકાતથી એવો જવાબ આપશે જે પહેલા ક્યારેય જોવા મળ્યો નથી. ટ્રમ્પે એમ પણ કહ્યું હતું કે આપણે ઈરાન અને ઈઝરાયલ વચ્ચે સરળતાથી સોદો કરી શકીએ છીએ અને આ લોહિયાળ સંઘર્ષ નો અંત લાવી શકીએ છીએ.

આ પહેલીવાર નથી જ્યારે રાષ્ટ્રપતિ ડોનાલ્ડ ટ્રમ્પે ઈરાનને ચેતવણી આપી હોય. અગાઉ, ટ્રમ્પે ઈરાનને ચેતવણી આપી હતી કે "તેઓ જે વિચારે છે, અનુમાન કરે છે અથવા કહેવામાં આવ્યું છે તેના કરતાં ઘણું ખરાબ હશે." તેમણે કહ્યું હતું કે અમેરિકા વિશ્વના શ્રેષ્ઠ અને ઘાતક લશ્કરી સાધનો બનાવે છે અને ઈઝરાયલ પાસે તેમાંથી ઘણું બધું છે અને તેઓ તેનો ઉપયોગ કેવી રીતે કરવો તે જાણે છે.

ડોનાલ્ડ ટ્રમ્પે અગાઉ પણ કહ્યું હતું કે ઈરાને તેના પરમાણુ કાર્યક્રમ ને રોકવા માટે શક્ય તેટલી વહેલી તકે સોદો કરવો જોઈએ. ટ્રમ્પે કહ્યું હતું કે ઈરાન પાસે બીજી તક પણ છે જે વધુ વિનાશને અટકાવી શકે છે. ઇઝરાયેલ દ્વારા ઈરાન પર કરવામાં આવી રહેલા હુમલાઓ વચ્ચે ટ્રમ્પે તેમની રાષ્ટ્રીય સુરક્ષા ટીમ સાથે પણ બેઠક યોજી છે.

તમને જણાવી દઈએ કે ઇઝરાયલે શુક્રવારે ઓપરેશન રાઇઝિંગ લાયન શરૂ કર્યું છે. આ ઓપરેશન હેઠળ ઇઝરાયલે ઈરાનના પરમાણુ પ્લાન્ટ, મિસાઈલ અને લશ્કરી સંકુલને નિશાન બનાવવાનું છે. ઇઝરાયલે આ ઓપરેશનમાં ઇરાનના ઘણા મુખ્ય લશ્કરી કમાન્ડરો અને પરમાણુ વૈજ્ઞાનિકોને મારી નાખ્યા છે. ઇઝરાયલી પીએમ બેન્જામિન નેતન્યાહુ એ સ્પષ્ટપણે કહ્યું છે કે લક્ષ્ય પ્રાપ્ત ન થાય ત્યાં સુધી હુમલા ચાલુ રહેશે.