અમદાવાદ : દેશના પ્રથમ સી પ્લેન માટે જેટી બનાવવાની કામગીરી પૂરજોશમાં, જુઓ શું છે જેટીની ખાસિયત..!

દેશમાં પ્રથમ સી પ્લેન માટે અમદાવાદ અને કેવડિયા કોલોની ખાતે વોટર એરોડ્રમ બનાવવાની કામગીરી પૂરજોશમાં ચાલી રહી છે. ત્યારે વોટર એરોડ્રામ માટે 48 મીટર લાંબી, 9 મીટર પહોળી અને 1 મીટર જાડાઈ ધરાવતી જેટી તૈયાર કરવામાં આવી છે. જોકે હાલમાં એક જ સી પ્લેનનો ઉપયોગ થવાનો હોવાથી જેટી 24 મીટરની જ રાખવામાં આવી છે. ત્યારબાદ તબક્કાવાર જેટીને લંબાવામાં આવશે.

અમદાવાદના આંબેકડર બ્રિજ નજીક જ્યા સી પ્લેનનું ટર્મિનલ બનાવવામાં આવ્યું છે, ત્યાં જેટીને ફિક્સ કરવામાં આવી છે. આ જેટી 1200 માણસોને ઉભા રહેવાની ક્ષમતા ધરાવે છે. જેટી માટે 12 મીટર લાંબા અને 3 મીટર પહોળા એક પોન્ટુન મળી કુલ 6 પોન્ટુનની મદદથી રિવરફ્રન્ટ ખાતે જેટી બનાવવામાં આવી રહી છે. વધુમાં કોંક્રીટથી તૈયાર થયેલી આ જેટી અંદરથી પોલી છે અને તેમાં વચ્ચે એક્સપાન્ડેડ પોલિસ્ટાયરિન ભરવામાં આવ્યું છે. જેથી જેટી લીજેક થાય ત્યારે પણ તેમાં પાણી નહીં ભરાય અને હંમેશા તરતી જ રહેશે. જેટી તૈયાર કરતી કંપની મરીન ટેક ઇન્ડિયા છે. જેટી માટે નદીમાં પાણીનું લેવલ ઓછામાં ઓછું 3 ફૂટ રાખવું પડશે. જેટીની ઊંચાઈ 1 મીટર છે જેમાંથી અડધી જેટી પાણીમાં રહેશે અને અડધી પાણીની ઉપર રહેશે. અગાઉ સ્ટીલ કે લાકડામાંથી જેટી તૈયાર કરાતી હતી અને તે ખૂબ જ ખર્ચાળ હોવાની સાથે તેનું મહત્તમ આયુષ્ય 15 વર્ષનું હોય છે, ત્યારે આ જેટીનું વજન 18000 કિલોગ્રામ છે અને તેનું આયુષ્ય 50 વર્ષનું છે.