સુરત : એકના ડબલમાં નાણા ગુમાવનારાઓના કલેકટર કચેરીમાં ધામા
સુરત શહેરમાં એકના ડબલ કરવાની સ્કીમો આપીને રોકાણકારોના રૂપિયા લઈને કંપનીઓ બંધ કરી દઈ છેતરપિંડી કરનારા સામે સીઆઈડી દ્વારા ગુનો નોંધીને કાર્યવાહી કરવામાં આવી રહી છે. સાથે જ આ કંપનીઓમાં રોકાણ કરનારા લોકોને દાવો રજૂ કરવા માટેનું જાહેરનામું બહાર પાડવામાં આવતાં ક્લેક્ટર કચેરી મોટી સંખ્યામાં લોકો પોતાના દાવા રજૂ કરવા માટે પહોંચી ગયા હતાં.
જી.પી.આઈ.ડી. એકટ 2003 હેઠળ સીઆઈડી ક્રાઈમ દ્વારા તાપસ કરીને જિલ્લા કોર્ટમાં કેસ નોંધાવ્યો છે. તપાસ હેઠળ મળી આવેલી ચિટ કંપનીઓની મિલકતો સરકારે જપ્ત કરી છે. રોકાણકારોના દાવા સ્વીકારવા એસડીએમ સુરતની નિમણૂક કરવામાં આવતાં લોકોની લાંબી કતારો લાગી ગઈ હતી. હાલ તમામ રોકણકારોએ કરેલા રોકાણની વિગતો મેળવવાની પ્રક્રિયા શરૂ કરી દેવામાં આવી છે. બે દિવસમાં દાવો કરવા આવેલા રોકાણકારોનો આંકડો ૨૯૫૪ સુધી પહોંચ્યો છે. ૩૦ ઓગસ્ટ સુધીમાં મોટા પ્રમાણમાં સંખ્યા વધે તો નવાઇની વાત નથી. સરકાર દ્વારા ભોગ બનનાર વતી કંપનીઓ સામે દાવો દાખલ કરવામાં આવનાર છે. આ માટે સિટી પ્રાંતની એસડીએમ તરીકે નિમણૂંક કરવામાં આવી છે. ભોગબનનાર પાસે દાવા અરજી લેવામાં આવી રહી છે. સરકાર ઠગોની મિલકત ટાંચમાં લેશે અને મિલકત વેચી અરજદારોને ચુંકવણી કરશે. આવી લોભામણી લાલચમાં આવીને નાણાં ગુમાવનારમાં મોટા ભાગના તાપી જિલ્લા, સુરત જિલ્લા અને જલગાંવથી પણ લોકો દાવો કરવા માટે આવ્યા હતા.
