અમદાવાદ : વધુ વજનવાળી ચેઇન પહેરતા પુરુષોને જ ટાર્ગેટ કરી લૂંટ ચલાવતા 3 શખ્સોની ધરપકડ...
અમદાવાદ શહેરના પૂર્વ વિસ્તારમાં છેલ્લા ઘણા સમયથી પુરુષને છરી બતાવીને લૂંટવાના બનાવો સામે આવી રહ્યા હતા.
અમદાવાદ શહેરના પૂર્વ વિસ્તારમાં છેલ્લા ઘણા સમયથી પુરુષને છરી બતાવીને લૂંટવાના બનાવો સામે આવી રહ્યા હતા. આ સમગ્ર બનાવવાની તપાસ દરમિયાન અમદાવાદ ક્રાઈમ બ્રાન્ચને એક મહત્વની સફળતા મળી છે. જેમાં તેમણે આરોપીઓને ઝડપી લીધા છે, જે આરોપીઓ માત્ર પુરુષોને જ રાત્રિના સમયે છરી બતાવીને લૂંટી લેતા હતા.
અમદાવાદ પોલીસની ગિરફ્તમાં રહેલા આરોપીઓ શિવસિંગ ઉર્ફે આશુ સિકરવાર, દિલીપ ઉર્ફે ભૂરો રાજપૂત અને રાજારામ ઉર્ફે સોનુ યાદવ છે. આ તમામ આરોપીઓ ખાસ મિત્રો છે. આ આરોપીઓ ખાસ અમદાવાદ શહેરના નિકોલ, નરોડા, રામોલ જેવા પૂર્વ વિસ્તારને ટાર્ગેટ કરતા હતા. તેઓ સાંજે કે, રાત્રે ટહેલવા નીકળતા માત્ર પુરુષોને જ ટાર્ગેટ કરતા હતા. જે પણ એકલ દોકલ પુરુષ નીકળે, ત્યારે છરો બતાવીને સોનાની ચેઇન લૂંટી લેતા હતા. સમગ્ર મામલે ક્રાઇમ બ્રાન્ચે બાતમીના આધારે આ ત્રણેય આરોપીની ધરપકડ કરીને 8 ગુનાનો ભેદ ઉકેલી કાઢ્યો છે. એટલું જ નહીં, આરોપીઓ પાસેથી સોનાની ચેઇન, વાહન અને મોબાઈલ સહિત રૂ. 11 લાખનો મુદ્દામાલ જપ્ત કરવામાં આવ્યો છે. પુરુષો વધુ વજનવાળી ચેઇન પહેરતા હોય છે, એટલે ખાસ તેઓ પુરુષોને જ ટાર્ગેટ કરતા હોવાનું પોલીસ તપાસમાં બહાર આવ્યું છે.