અમદાવાદ કોર્પોરેશનના ટાઉન પ્લાનિંગ ખાતાના આસિસ્ટન્ટ TDO અને તેમનો સાગરીત એન્જિનિયર 20 લાખ રૂપિયાની લાંચ લેતા ACBના છટકામાં રંગેહાથ ઝડપાઈ ગયા હતા.

અમદાવાદ મ્યુનિસિપલ કમિશનર કચેરીમાં ફરજ બજાવતા આસિસ્ટન્ટ TDOએ મિલકતની વૈકલ્પિક વ્યવસ્થા કરવાના કામ પેટે રૂપિયા 50 લાખની માંગણી કરી હતી. જે પેટે અરજદારે આરોપીને રૂપિયા 20 લાખ આપ્યા હતા. જેમાં આરોપી હર્ષદ ભોજક અને આશિષ પટેલ રંગેહાથ ઝડપાઈ ગયા હતા. અમદાવાદ શહેરમાં આ કામના ફરિયાદીની વડીલો પાર્જીત જમીનમાં મકાનો અને દુકાનો હતી. જે અમદાવાદ મનપા દ્વારા કબજો લઈ તોડી નાખવામાં આવી હતી. જેથી મકાનો અને દુકાનોના ભાડુઆતો તથા આ કામના ફરિયાદીએ કાયદાકીય પ્રક્રિયા કરી હતી.

જેમાં જણાવ્યું હતું કે, AMCની કચેરીએ જઇ જરૂરી પુરાવા રજૂ કરશો, તો AMC તેઓને વૈકલ્પિક વ્યવસ્થા કરી આપશે. જેથી ફરિયાદી ગવર્નમેન્ટ એપ્રુવલ એન્જિનિયર આશિષ પટેલને મળ્યા હતા, જ્યાં તેઓને AMCમાં આસિસ્ટન્ટ TDO તરીકે ફરજ બજાવતા હર્ષદ ભોજક સાથે મુલાકાત કરાવી હતી. જેથી હર્ષદ ભોજકે ફરિયાદીનું કામ કરી આપવા માટે રૂપિયા 50 લાખની લાંચ માંગી હતી, જ્યારે આશિષને રૂપિયા 10 લાખ આપવાની વાત થઈ હતી. જોકે, રકઝકના અંતે 20 લાખ રૂપિયા આપવાનું નક્કી કરવામાં આવ્યું હતું. પરંતુ ફરિયાદી લાંચની રકમ આપવા ન માંગતા હોવાથી તેઓએ ACBનો સંપર્ક કર્યો હતો. જેના આધારે ACBની ટીમે આશ્રમ રોડ પર ચીનુભાઈ ટાવર સામે આવેલ અક્ષર સ્પેસ ઇન્ફ્રાસ્ટ્રક્ચરની ઓફિસમાં છટકું ગોઠવ્યું હતું, જ્યાં હર્ષદ ભોજક ફરિયાદી પાસેથી લાંચ સ્વીકારતા રંગેહાથ ઝડપાઈ ગયા હતા. હાલ તો ACBએ બન્ને લાંચિયા અધિકારીઓની ધરપકડ કરી કાયદેસરની કાર્યવાહી હાથ ધરી છે.