અમદાવાદ : નૂપુર શર્માની વિવાદાસ્પદ ટિપ્પણીના પડઘા હવે રાજ્યભરમાં પડ્યા, પોલીસ બની સતર્ક

ભાજપના પૂર્વ પ્રવક્તા નૂપુર શર્માની વિવાદાસ્પદ ટિપ્પણી પડઘા હવે રાજ્યભરમાં પડી રહ્યા છે, ત્યારે અમદાવાદમાં અચાનક વિરોધ પ્રદર્શન થતા પોલીસ તંત્ર એલર્ટ મોડ પર આવી ગયું છે. શહેરના સંવેદનશીલ વિસ્તારમાં પોલીસ પેટ્રોલિંગ અને પોઇન્ટ મૂકવામાં આવ્યા છે.

ભાજપના પૂર્વ પ્રવક્તા નુપુર શર્માના વિરોધમાં અમદાવાદના લાલ દરવાજા ખાનપુર અને મીરઝાપુર વિસ્તારમાં બપોરની નમાજ પછી મુસ્લિમ બિરાદરોએ રેલી કાઢી વિરોધ કર્યો હતો. થોડી જ ક્ષણોમાં શહેરના અનેક વિસ્તારોમાં વિરોધ પ્રદર્શન થયા હતા. આ બાબતે પોલીસને મેસેજ મળતા ઉચ્ચ પોલીસ અધિકારીઓ સ્થળ પર પહોંચ્યા હતા અને આગેવાનો સાથે બેઠક કરી ટોળાને પરત મોકલ્યા હતા.

અમદાવાદ શહેરમાં કોઈ અનિચ્છનીય ઘટના ન બને તે માટે શહેરના સંવેદનશીલ વિસ્તારમાં પોલીસની ટીમો અને એસ.આર.પી જવાનો તૈનાત કરવામાં આવી છે. તો સ્થાનિક પોલીસ અધિકારીઓને હેડ ક્વાર્ટરના છોડવા પણ આદેશ આપવામાં આવ્યા છે. પોલીસે અપીલ કરી છે કે કોઈ પણ પ્રકારની અફવા સોશિયલ મીડિયાના ફેલાવે અને જો કોઈ આવી હરકત કરશે તો કાયદેસરની કાર્યવાહી કરવામાં આવશે. શહેરમાં કોઈ પણ ઘટના માટે પોલીસ તંત્ર સજ્જ છે.