T20 વર્લ્ડ કપ 2022 : પાકિસ્તાન-સાઉથ આફ્રિકાની મેચમાં વરસાદનું વિધ્ન, જીત માટે સા.આફ્રિકાએ હવે 30 બોલમાં 73 રન જરૂર

T20 વર્લ્ડ કપની 36મી મેચમાં પાકિસ્તાન અને દક્ષિણ આફ્રિકાની ટીમો આમને-સામને છે. આ મેચ સિડનીમાં રમાઈ રહી છે. પાકિસ્તાને ટોસ જીતીને બેટિંગ કરવાનો નિર્ણય લીધો હતો. સેમી ફાઈનલની રેસમાં ટકી રહેવા માટે તેણે આજની મેચ કોઈપણ ભોગે જીતવી પડશે. તો બીજી તરફ, દક્ષિણ આફ્રિકાએ 3 મેચમાં 5 પોઈન્ટ મેળવ્યા છે. જો તે આજે જીતશે તો સેમી ફાઇનલમાં પહોંચી જશે.

સિડનીમાં મેચમાં પ્રથમ બેટિંગ કરતા પાકિસ્તાને 20 ઓવરમાં 9 વિકેટ ગુમાવીને 185 રન બનાવ્યા હતા. સૌથી વધુ રન શાદાબ ખાનના બેટમાંથી આવ્યા હતા, તેણે 22 બોલમાં 52 રનની ઇનિંગ રમી હતી. આ દરમિયાન શાદાબે 4 છગ્ગા અને 3 ચોગ્ગા માર્યા હતા. તે જ સમયે, ઇફ્તિખાર અહેમદે 35 બોલમાં 51 રન બનાવ્યા હતા. દક્ષિણ આફ્રિકા તરફથી એનરિક નોર્ટ્યાએ સૌથી વધુ 4 વિકેટ લીધી હતી. જવાબમાં દક્ષિણ આફ્રિકાએ 9 ઓવરમાં 4 વિકેટ ગુમાવીને 69 રન બનાવ્યા હતા. વરસાદના કારણે મેચ રોકી દેવામાં આવી છે. ડકવર્થ લુઈસ નિયમ અનુસાર, દક્ષિણ આફ્રિકા હજુ 15 રન પાછળ છે. ટ્રિસ્ટન સ્ટબ્સ અને હેનરિક ક્લાસેન ક્રિઝ પર છે.